Gonkongtaǵy iri órttiń sebepteri anyqtaldy
ASTANA. KAZINFORM — Ótken jyldyń qarasha aıynda 168 adamnyń ómirin qıǵan Gonkongtaǵy Wang Fuk Court turǵyn úı keshenindegi iri órttiń sebepterin tergeý adam faktorynyń áserinen ekenin kórsetti. Bul týraly Kazinform agenttiginiń Beıjińdegi menshikti tilshisi South China Morning Post basylymyna silteme jasap habarlady.
Táýelsiz tergeý komıtetiniń tyńdaýy barysynda ISS EastPoint basqarýshy kompanııasynyń ókili órt dabyly júıesiniń óshirilgenin jáne evakýatsııa joldaryndaǵy otqa tózimdi terezelerdiń alynyp tastalǵanyn moıyndady.
Bas zań keńesshisi Vıktor Doýz bul zań buzýlardy, sondaı-aq nysanda qyzmetkerlerdiń temeki shegýin órttiń jyldam taralýyna ákelgen negizgi sebepter retinde baǵalady. Bul oqıǵa 1948 jyldan bergi Gonkongtaǵy eń qasiretti órt retinde tirkeldi.
Basqarýshy uıym qyzmetkeri sotta órt qaýipsizdigin baqylaý jáne táýekelderdi jedel joıý boıynsha kelisimsharttyq mindettemelerdiń oryndalmaǵanyn rastady. Alaıda atalǵan aýyr aıyptaýlarǵa qaramastan, ISS EastPoint kompanııasynyń joǵary basshylyǵy ázirge bul is boıynsha resmı túsinikteme bermegen.
Wang Fuk Court turǵyn úı keshenindegi órtke qatysty ashyq tyńdaýlardyń ekinshi kezeńi 8 sáýirge josparlanǵan. Bul otyrys 19 naýryzda bastalǵan resmı tergeý protsesiniń jalǵasy bolmaq.
Buǵan deıin Gonkongta iri órtten keıin abaısyzda adam ólimine ákeldi degen kúdikpen 13 adamnyń ustalǵany habarlanǵan edi.