Gonkongtaǵy órtten qaza tapqandardyń otbasylaryna 25,7 myń dollardan tólenedi

ASTANA. KAZINFORM — Gonkong bıligi órt kezinde qaza tapqan jáne zardap shekken jandardyń otbasylaryna ótemaqy tóleıdi, dep habarlaıdy TASS.

South China Morning Post gazetiniń habarlaýynsha, árbir qaza tapqan adamnyń otbasy 200 myń gonkong dollaryn (25,7 myń AQSh dollary) jáne jerleý rásimin ótkizý úshin memlekettik qoldaý qarajatyn alady. Al bul oqıǵada zardap shekken árbir adam budan buryn ýáde etilgen 10 myń gonkong dollaryna (1,3 myń AQSh dollary) qosymsha retinde 50 myń gonkong dollary (6,4 myń AQSh dollary) mólsherinde járdemaqy alady.

Budan bólek, árbir zardap shekken otbasyǵa kúndelikti máselelerdi sheshýge kómektesetin arnaıy áleýmettik qyzmetker bekitiledi. Sonymen qatar barlyq zardap shekkenderge ýaqytsha turǵyn úı tegin beriledi.

Aıta keteıik, órt sársenbi kúni Gonkongtyń jańa aýmaǵy sanalatyn Taı Po aýdanyndaǵy Wang Fuk Court dep atalatyn segiz bıik turǵyn úıden turatyn keshende bastalǵan. Bir ǵımaratqa is júzinde zaqym kelmegen, al jeti ǵımaratty jalyn sharpyǵan. Órt ǵımarattarǵa kosmetıkalyq jóndeý júrgizý úshin ornatylǵan bambýk qurylys panelderi arqyly tez taralǵan. Keshende shamamen 2 myń páter bar, onda 4 myńǵa jýyq adam turady.

Buǵan deıin Gonkongtyń sybaılas jemqorlyqqa qarsy táýelsiz komıssııasy turǵyn úı keshenindegi órtke qatysty tergeý aıasynda segiz adamdy ustaǵany habarlanǵan edi.