Gonkongtaǵy órt: úsh qurylysshy qamaýǵa alyndy

ASTANA. KAZINFORM — Gonkongtyń Taı Po aýdanyndaǵy «Van Fýk Kort» turǵyn úı keshenindegi órt áli sóngen joq. Tilsiz jaýdan mert bolǵandardyń sany 44-ke jetti, dep habarlaıdy Reuters.

Órt sóndirýshiler túnnen beri jumys istep jatyr. Biraq qatty ystyq pen qoıý tútin 32 qabatty munaralardyń joǵarǵy qabattaryna shyǵýdy qıyndatty. 

Polıtsııa tórt kópqabatty úıdegi órttiń aýyzdyqtalǵanyn habarlady. Bılik buǵan deıin órt 7 ǵımaratty sharpyǵanyn habarlaǵan bolatyn.

Quzyrly organdar ǵımaratqa jóndeý jumystaryn júrgizip jatqan qurylys kompanııasynyń úsh azamatyn qamaýǵa aldy.

Mamandardyń aıtýynsha, bul 1962 jyldan beri qaladaǵy eń joıqyn órt boldy. Sol jyldyń 2 tamyzynda Koýlýnnyń Sham Shýı Po aýdanynda bolǵan órtte 44 adam kóz jumǵan. Al 1948 jyldyń 22 qyrkúıeginde Wing On qoımasynda órt shyǵyp, 176 adam qaza tapqan bolatyn. Gonkong tarıhyndaǵy eń úlken órt 1918 jyly Happy Valley ıppodromynda boldy. Onda 600-den astam adam mert boldy.

Aıta keteıik, Gonkongtegi órtten zardap shekken 7 adamnyń jaǵdaıy aýyr. Bılik órttiń tez taralýyn «qalyptan tys» dep atap, onyń sebebin anyqtaý úshin qylmystyq tergeý júrgizetinin habarlady.