Gonkongtaǵy órt oqıǵasyna qatysty segiz adam tutqynǵa alyndy
ASTANA. KAZINFORM — Gonkongtyń sybaılas jemqorlyqqa qarsy táýelsiz komıssııasy 28 qarashada turǵyn úı keshenindegi órtke qatysty tergeý aıasynda segiz adamdy tutqyndaǵanyn habarlady, dep jazady TASS.
South China Morning Post (SCMP) gazetiniń málimetteri boıynsha, tańerteń Will Power Architects kompanııasynyń eki dırektory tutqyndaldy. Olar órt shyqqan Wang Fuk Court kesheninde júrgizilgen jumystardy baqylaǵan.
Keıinnen taǵy alty adam quryqtaldy, onyń ishinde qurylys sórelerin ornatýmen aınalysqan sýbpodrıadtyq kompanııanyń eki ıesi bar. Sondaı-aq, komıssııa qyzmetkerleri 13 keńsede, onyń ishinde konsaltıngtik kompanııa men sýbpodrıadtyq uıymnyń keńselerinde tintý júrgizip, tehnıkalyq qujattar men banktik anyqtamalardy tárkilegen.
27 qarashada Prestige Construction & Engineering Co Limited qurylys kompanııasynyń úsh qyzmetkeri ustaldy, olar órt shyqqan keshende jóndeý jumystaryn júrgizgen.
Kompanııanyń eki dırektory men ınjener-konsýltanty órttiń saldarynan adamdardyń ólimine ákep soqqan is-áreketteri úshin abaısyzda kisi óltirý qylmysymen aıyptalyp otyr. Tergeý málimetteri boıynsha, aldyn ala tergeý qorytyndylary órt kezinde júrgizilgen jóndeý jumystary úshin qoldanylǵan qorǵanysh torlary, brezentter men plastıkalyq plenkalar órt qaýipsizdigi talaptaryna sáıkes bolmaýy múmkin ekenin kórsetti.
Wang Fuk Court keshenindegi órt Gonkong tarıhyndaǵy eń iri apat bolyp, 128 adamnyń ómirin jalmady. Buǵan deıin eń kóp adam qurban bolǵan órt 1996 jyly Garley Building kesheninde bolǵan edi, onda 41 adam qaza taýyp, 81 adam jaraqat alǵan. Al Gonkongtyń tarıhyndaǵy eń úlken apat 1918 jyly 27 aqpanda bolǵan. Sol kezde Heppı-Vellı ıppodromynda ýaqytsha trıbýna qulap, órt shyqqannan keıin 600-den astam adam qaza tapqan.
Buǵan deıin Qazaqstan Prezıdenti Qasym-Jomart Toqaev Gonkongtaǵy órtke baılanysty Qytaı Prezıdenti Sı Tszınpınge kóńil aıtqan edi.