Gonkongtaǵy órt: qalada úsh kúndik aza tutý jarııalandy
ASTANA. KAZINFORM — Gonkong bıligi Taı Po turǵyn úı kesheninde bolǵan joıqyn órttiń qurbandaryn eske alý maqsatynda senbiden bastap qalada úsh kúndik aza tutý jarııalanatynyn málimdedi, dep habarlaıdy SCMP.
Barlyq memlekettik ǵımarattarda Qytaıdyń memlekettik týy men Gonkong týy dúısenbige deıin tómen túsiriledi, al resmı is-sharalar toqtatylady nemese keıinge qaldyrylady. Qala turǵyndary 18 aýdanda ornalasqan arnaıy kitaptarǵa 9:00–21:00 aralyǵynda óz kóńil aıtýlaryn jazyp qaldyra alady.
Qaýipsizdik jónindegi hatshy Krıs Tan Pın Kyńnyń sońǵy derekterine sáıkes, órt 128 adamnyń ómirin alyp ketti, shamamen 200 adam áli de tabylar emes. Jeti kvartaldy sharpyǵan jalyn 43 saǵat boıy sóndirilgen. Qaza tapqandardyń 39-ynyń kim ekeni anyqtaldy, al qalǵan deneler qatty kúıip ketkendikten, sáıkestendirý jumystary áli júrip jatyr.
Bılik zardap shekkenderge kórsetiletin qarjylaı kómekti de kúsheıtti: árbir qaza tapqan adamnyń otbasy 200 myń gonkong dollaryn alady, al 50 myń gonkong dollar kólemindegi qosymsha tólemder kelesi aptadan bastap berile bastaıdy. Memleket krematsııa men jerleý shyǵyndaryn óz moınyna alady, al tazalyq departamenti krematsııa oryndary men kolýmbarıılerdi uıymdastyrady.
Jergilikti turǵyndar da qaıǵyly oqıǵadan keıin qalpyna keltirý jumystaryna belsendi atsalysyp jatyr, al bılik órttiń sebepterin anyqtaý boıynsha tergeýdi qolǵa aldy. Qazirgi tańda 11 adam qamaýǵa alynǵan.
Senbi kúni saǵat 08:00-de qala basshysy Djon Lı Ka-Chıý mınıstrler kabınetimen birge qaza tapqandardy eske alyp, úsh mınýt únsizdik jarııalaıdy.
Buǵan deıin Gonkongtaǵy sońǵy jetpis jyl ishindegi eń iri órttiń aýyzdyqtalǵany habarlanǵan bolatyn.
Eske sala ketsek, Wang Fuk Court turǵyn úı keshenindegi órt qala tarıhyndaǵy turǵyn úı ǵımaratynda bolǵan eń qaıǵyly jaǵdaı boldy. Jalyn árleý jóndeý jumystaryn júrgizý úshin ornatylǵan bambýktan jasalǵan qurylys materıaldary arqyly taralǵan. Keshende eki myńǵa jýyq páter ornalasqan, shamamen tórt myń adam turǵan. Gonkongtaǵy bul tragedııaǵa qurylys panelderiniń ústine tastalǵan temeki shoǵy sebep bolýy múmkin degen boljam bar.
QHR Tóraǵasy Sı Tszınpın qaza tapqandar men zardap shekkenderdiń otbasylaryna tereń qaıǵyryp, kóńil aıtty.
Qazaqstan Prezıdenti Qasym-Jomart Toqaev ta Sı Tszınpınge kóńil aıtý jedelhatyn joldady.