Gonkongtaǵy órt: joǵaldyǵa sanalǵan 159 adamnyń aman ekeni anyqtaldy

ASTANA. KAZINFORM — Gonkong polıtsııasy 26 qarashada Taı Po turǵyn úı kesheninde bolǵan iri órt kezinde habar-osharsyz joǵaldy dep sanalǵan tizimindegi 159 adamnyń qaýipsizdigin rastady, dep habarlaıdy Sınhýa aqparat agenttigi.

Jergilikti polıtsııa ókili Tszen Shýsıan baspasóz máslıhatynda órtten qaza tapqandar sany 146 adamǵa jetkenin, taǵy 79 adam jaraqat alǵanyn atap ótti.

Qytaı Halyq banki zardap shekkenderge kómek kórsetý úshin QHR ishki aýdandarynan túsetin qytaı ıýanimen qaıyrymdylyq jasaý úshin «jasyl dáliz» ashty.

Bul sheshim kommertsııalyq bankterge tıisti qujattar men aqparatty teksermeı-aq qarajatty tikeleı «Hýnfýıýan» qoldaý qorynyń shotyna aýdarýǵa múmkindik beredi.

Tıisti derekter transshekaralyq ıýan tólemderin basqarý aqparattyq júıesi arqyly usynylady.

Gonkong bıligi Taı Po turǵyn úı kesheninde bolǵan joıqyn órttiń qurbandaryn eske alý maqsatynda qalada úsh kúndik aza tutý jarııalady.

Sonymen qatar Gonkongtaǵy órtten qaza tapqandardyń otbasylaryna 25,7 myń dollardan tólenetini belgili boldy.

Budan buryn Qasym-Jomart Toqaev Gonkong qalasynda bolǵan alapat órt saldarynan kóptegen adamnyń qaza tabýyna baılanysty Sı Tszınpınge jáne barsha Qytaı halqyna kóńil aıtty.