Gonkongtaǵy qazaqstandyq sýretshiniń jeke kórmesi ashyldy
ASTANA. KAZINFORM — Gonkongtaǵy Mura óneri jáne toqyma ortalyǵynda qazaqstandyq sýretshi Gúlnur Muqajanovanyń «Jan jasaýy» atty jeke kórmesi ashyldy. Joba Ortalyq Azııa mádenıetindegi toqyma óneriniń róli men rýhanı mánine arnalǵan.
Bul týraly sýretshi Gúlnur Muqajanova Jibek Joly arnasyndaǵy «Búgin live» baǵdarlamasyna bergen suhbatynda málimdedi.
— Týyndylarym tizilip turǵan kórmeme «Jan jasaýy» degen at qoıdym. Jasaý — tek zattyq dúnıe emes, ol ata-babadan mıras bolyp qalǵan ishki rýhanı qazyna. Men úshin jan — bizdiń tamyrymyz, tarıhı jadymyz, ulttyq bolmysymyz. Dástúrli túsinikte jasaý kóbine turmys qurýmen, salt-dástúrmen baılanystyrylady. Alaıda men bul uǵymdy keńirek aıada, mádenı mura men rýhanı baılyqtyń jalǵasy retinde qarastyramyn. Qazir ata-babadan jetken mura búgingi qoǵamǵa qalaı áser etedi? Ol jas býynnyń dúnıetanymyna qandaı yqpal jasaıdy? Meniń ónerim — osy suraqtarǵa jaýap izdeýden týǵan týyndylar, — deıdi ol.
Avtor týyndylarynyń basym bóligi jún, jibek jáne vıskozadan jasalǵan. Sonymen qatar ekspozıtsııada kıizge aıryqsha mán berilgen. Sýretshiniń jeke toptamasyndaǵy vıntaj matalar da kórermen nazaryna usynyldy. Onyń aıtýynsha, dástúrli materıaldardy zamanaýı tásilmen ushtastyrý tarıh pen búgingi ýaqyt arasyndaǵy sabaqtastyqty tereńirek tanýǵa múmkindik beredi.
— Qaı jerde júrsem de, qazaq ónerin álemge tanytýdy ózime maqsat etemin. Ultymyzdyń mádenı erekshelikterin zamanaýı óner tili arqyly kórsetýge umtylamyn. Qazaqstanda kıiz kóbine turmystyq buıym, jerge tóseletin tekemet retinde tanylǵan. Biraq men ony jańa keńistikte, jańa mazmunda kórsetkim keldi. Odan bólek, kórmede Gonkong pen Qytaıda óndiriletin matalardy paıdalanyp, jańa týyndylar jasadym. Bul jumysymda tarıhı sabaqtastyqty negizge aldym. Uly Jibek joly kerýenderi arqyly san alýan asyl matalar bizdiń dalaǵa jetkeni belgili. Ata-babalarymyz sol matalardan kıim-keshek tigip, turmysta keńinen qoldanǵan. Men sol ýaqyt óte umyt qalǵan matalardy qaıta zerdelep, olardan arnaıy toptamalar ázirledim, — deıdi sýretshi.
Osy tusta Gúlnur Muqajanova kórmedegi kıizden jasalǵan jumystarǵa sheteldik kórermenniń erekshe baǵa bergenin atap ótti.
— Bul kórme aýqymdy ári mazmundy joba boldy. Naýryz aıyna deıin jalǵasady. Gonkong jurtshylyǵy tarapynan erekshe qyzyǵýshylyq baıqalady. Ortalyq Azııa óneri olar úshin beıtanys bolǵandyqtan, mádenıetimiz de kópshilikke tańsyq edi. Sol sebepti usynylǵan ár týyndy jańalyq retinde qabyldandy. Tipti kıizdi alǵash ret kórgen jandar da boldy, — deıdi avtor.
Sýretshi qazirgi tańda Germanııada bilimin jetildirip júr. Sonymen qatar jańa týyndylaryn ázirlep, aldaǵy ýaqytta taǵy kórmeler uıymdastyrýdy josparlap otyrǵanyn aıtty.
— Sýret salýmen men kishkentaı kezimnen aınalysamyn. Ónerge degen alǵashqy qadamymdy úlken ápkemniń qoldaýymen bastadym. Sol kisiniń úıretýi men jigerlendirýiniń arqasynda bul joldy sanaly túrde tańdadym. Aldymen Qaraǵandydaǵy akademık E.A. Bóketov atyndaǵy ýnıversıtette bilim aldym, keıin Almatydaǵy óner akademııasynda oqýymdy jalǵastyrdym. Qazir Germanııada turamyn osy jaqta magıstratýra támamdadym, — deıdi Gúlnur Muqajanova.
Aıta keteıik, jaqynda Almatyda alǵash ret álemdegi eń iri IT-kórmelerdiń biri ótedi.