Gonkongta ustalǵan qazaq stýdentiniń soty 2020 jyldyń qańtarynda ótedi
NUR-SULTAN. QazAqparat - Gonkongta ustalǵan qazaq stýdentiniń soty 2020 jyldyń qańtarynda ótedi. Bul týraly búgin QR Syrtqy ister mınıstrliginiń resmı ókili Aıbek Smadııarov aıtty, dep habarlaıdy QazAqparat tilshisi.
«Sotyn kútip otyrmyz. Tergeý júrip jatyr. Soty kelesi jyldyń qańtar aıynyń ortasyna josparlanǵan. Ózderińiz biletindeı, ol jaqta kóp adam ustaldy. Ýaqyty kelgende soty bolady. Sol sotta sheshim qabyldanady. Advokat taptyq, týystary Gonkongqa bardy. Olarmen kezdesý ótkizdik. Quqyqtyq kómek kórsetip jatyrmyz», - dedi Aıbek Smadııarov.
Eske sala ketsek, Gonkong qalasynda narazylar men polıtsııa arasyndaǵy qaqtyǵys kezinde Qazaqstan azamaty ustalǵany habarlanǵan bolatyn.
«Gonkong qalasy polıtsııasynyń qazaqstandyq dıplomattarǵa usynǵan aqparatyna sáıkes, 18 qarasha kúni narazylyq tanytýshylarmen qaqtyǵys barysynda Qazaqstan azamaty, Gonkong Baptıst ýnıversıtetiniń birinshi kýrs stýdenti Núkpı Ábilqaıyr ustalǵan. Konsýl azamatymyzǵa bardy, onyń densaýlyq jaı-kúıi turaqty, oń qolynyń shyntaǵynda ustaý kezinde qulaǵan sátte alǵan azdaǵan jaraqaty bar. Ustalý jaǵdaıyna eshqandaı shaǵymy joq», - dep atap ótken edi mınıstrlikten.
