Gonkongta turǵyn úı keshenindegi órtten qaza tapqandar sany 36-ǵa jetti
ASTANA. KAZINFORM — Gonkongtaǵy turǵyn úı kesheninde bolǵan órtten kem degende 36 adam qaza taýyp, 270-ten astam adam habar-osharsyz ketti, dep habarlaıdy TASS.
South China Morning Post gazeti habarlaǵandaı, 29 adam aýrýhanaǵa jatqyzylǵan, olardyń jetiýi aýyr jaǵdaıda. Gonkong bıligi órttiń tez taralýyn «qalyptan tys» dep atap, onyń sebebin anyqtaý úshin qylmystyq tergeý júrgizetinin ýáde etti.
Qytaı Halyq Respýblıkasynyń Gonkong (Sıangan) arnaıy ákimshilik aımaǵynyń ákimshiliginiń (úkimetiniń) basshysy Djon Lı (Lı Tszıachao) 7 jeltoqsanǵa josparlanǵan jergilikti saılaýǵa qatysty qyzmetter ýaqytsha toqtatylǵanyn habarlady. Ol ákimshilik apatqa baılanysty saılaýdy keıinge shegerý máselesin qarastyryp jatqanyn atap ótti.
Órt Taı Po aýdanyndaǵy «Van Fýk Kort» turǵyn úı keshenindegi bıik ǵımarattardy sharpyǵan. Kórshi ǵımarattarda kosmetıkalyq jóndeý jumystaryn júrgizý úshin ornatylǵan bambýk qalqandary arqyly órt jyldam taralǵan. Keshende shamamen 2 myń páter bar jáne onda 4 myńdaı adam turady.
Sońǵy ret Gonkongta besinshi deńgeıdegi órt 2008 jyly tirkelgen bolatyn. Sol kezde túngi klýbta bolǵan órtten tórt adam qaza taýyp, 55 adam jaraqat alǵan edi.
Eske salsaq, budan buryn 13 adam qaza taýyp, 16 adam aýyr jaraqattar men kúıik alǵany habarlanǵan edi. Gonkongtaǵy turǵyn úı kesheninde tutanǵan órtpen kúresý úshin 767 órt sóndirýshi, 400 polıtsııa qyzmetkeri, 128 órt tehnıkasy jáne 57 jedel járdem kóligi jumyldyryldy.
