Gonkongta Ortalyq Azııa elderi bankiniń alǵashqy fılıaly ashyldy
ASTANA. KAZINFORM — Qyrǵyzstannyń bankine Qytaıdyń Gonkong arnaıy ákimshilik aımaǵynda «Shekteýli lıtsenzııasy bar bank» ruqsat qaǵazy berildi, dep habarlaıdy Kazinform agenttiginiń Beıjińdegi menshikti tilshisi.
Gonkong valıýta basqarmasynyń baspasóz habarlamasyna súıensek, Qyrǵyzstan bankine keminde 500 000 Gonkong dollary (63 776 AQSh dollary) kólemindegi depozıtterdi qabyldaýǵa jáne korporatıvtik jáne ınvestıtsııalyq bank operatsııalaryn júrgizýge ruqsat berilgen. Ruqsat qaǵazy 5 qazanda kúshine endi.
Qyrǵyzstan banki Gonkongta shekteýli bank lıtsenzııasyn alǵan 17-shi qarjy mekemesi boldy. Burynyraqta osyndaı qujat Belgııa, Ulybrıtanııa, Indonezııa, Nıderlandy, Taıland jáne Ońtústik Koreıa bankterine berilgen.
Qyrǵyzstan qarjy mekemesiniń málimdemesinde bul Ortalyq Azııa men Azııanyń eń iri naryqtary arasynda jańa qarjylyq kópir qurý múmkindigin bildiretini aıtylǵan.
Buǵan deıin Qazaqstan men Gonkong ınvestıtsııalyq jobalardy quqyqtyq súıemeldeýdi kúsheıtetinin habarlaǵan bolatynbyz.
