Gonkongta koronavırýsty qaıta juqtyrý jaǵdaıy anyqtaldy
LONDON. VVS-QazAqparat – Gonkong ýnıversıtetiniń ǵalymdary koronavırýsty qaıta juqtyrýdyń alǵashqy jaǵdaıy anyqtalǵanyn habarlady.
4,5 aı buryn Covid-19-ben aýyryp shyqqan er adamǵa osy dıagnoz ekinshi ret qoıyldy. Infektsııany anyqtaýǵa qaıtadan test tapsyrý kezinde patsıentten aýrýdyń esh belgisi baıqalmaǵan, dep habarlaıdy QazAqparatBı-bı-sı-ge silteme jasap.
Vırýsty zertteý onyń RNQ-sy alǵashqy ınfektsııany týdyrǵan SARS-Cov-2 shtammynyń genetıkalyq kodynan aıtarlyqtaı erekshelenetinin kórsetti.
Ǵalymdar Covid-19 vırýsymen aýyrǵan adamdardyń vırýsqa qarsy ımmýnıtetke ıe bolatynyn biledi, biraq bul qorǵanystyń qanshalyqty tıimdi ekeni jáne qansha ýaqytqa sozylatyny áli belgisiz. Gonkongtaǵy patsıenttiń jaǵdaıy búkil álem boıynsha 800 myńnan astam adam qaıtys bolǵan vırýsqa qarsy ımmýnıtettiń óte qysqa bolýy múmkin ekenin kórsetedi.
33 jastaǵy Gonkong turǵyny Covid-19-ben aýyryp, sáýir aıynda aýrýhanadan jazylyp shyqqan, dárigerler ony aýrýdan tolyq aıyqty dep málimdegen. Alaıda, tamyz aıynda Ispanııadan sapardan oralǵannan keıin ol áýejaıda mindetti test tapsyrǵan. Onyń nátıjesi vırýstyń bar ekenin taǵy da rastady.
Buǵan deıin Qytaı bıligi vırýstyń qaıta anyqtalýynyń birneshe jaǵdaıy týraly habarlaǵan bolatyn. Olardyń málimetteri boıynsha, naýqastardyń 5-15%-y koronavırýspen ekinshi ret aýyrǵan. Biraq bul adamdar vırýsty shynymen qaıta juqtyrdy ma, álde olar birinshi ret aýyrǵanda tolyq emdelmedi me, ol jaǵy naqty emes. Bulaı senimdi túrde aıtý múmkin emes.
Gonkongtegi patsıentten aýrýdyń esh belgileri baıqalmaǵan.
Eger adamdar jańa vırýsty birneshe ret juqtyrýy múmkin ekeni belgili bolsa (mysaly, tumaý sııaqty), tipti, tıimdi vaktsına ýaqytynda jasalsa da bul vaktsınatsııany aıtarlyqtaı qıyndatady.
Alaıda, DDU qandaı da bir tujyrym jasaýǵa áli erte deıdi. Óıtkeni bizde qaıta juqtyrý jaǵdaıy jalǵyz ǵana.
Gonkongtyq patsıentti tekserý nátıjeleri ǵylymı ádebıetterde áli jarııalanbaǵan, sondyqtan bul jaǵdaıdyń kóptegen aspektileri áli anyq emes.
