Gonkongta bolǵan «qyshqyl shabýylynan» 30 adam zardap shekti
ASTANA. Qańtardyń 10-y. QazAqparat - Ýly qyshqyl quıylǵan plastık shólmektermen jasalǵan jańa shabýyldyń saldarynan 30 adam zardap shekti, olardyń ishinde bir bala jáne 9 sheteldik týrıst bar. Polıtsııa ókiliniń habarlaýynsha, oqıǵa senbi kúni keshke Templ-strıttiń túngi kóshe bazarlarynyń birinde oryn aldy,
dep habarlaıdy ITAR-TASS agenttigi.
Qyshqyl quıylǵan eki ashyq plastık shólmek jaqyn mańdaǵy úılerdiń biriniń shatyrynan laqtyrylǵan. Zardap shegýshiler kishigirim hımııalyq kúıik jaraqattaryn alǵan. Olardyń barlyǵyna medıtsınalyq kómek kórsetildi.
Bul megapolıstiń halyq kóp shoǵyrlanǵan aýdandarynda sońǵy 13 aıda jasalǵan altynshy «qyshqyl shabýyly». Beti ashylmaǵan bul qylmystardan jalpy eseppen 100-den astam adam zardap shegip otyr. Degenmen, polıtsııa sońǵy oqıǵaǵa qatysy bar degen kúdiktiniń ustalǵanyn málim etti. Qazir odan jaýap alynýda.
