Gonkongta Alatau City boıynsha 6 kelisimge qol qoıyldy — Úkimet
ASTANA. KAZINFORM — Gonkong ınvestorlary Alatau City jobasyna qyzyǵýshylyq bildirdi, dep habarlaıdy QR Úkimetiniń baspasóz qyzmeti.
Gonkongta Alatau City Roadshow ınvestıtsııalyq dóńgelek ústeli ótti. QHR-dyń Gonkong Arnaıy ákimshilik aýdanyna jumys sapary aıasynda Qazaqstan Respýblıkasy Premer-mınıstriniń orynbasary Qanat Bozymbaev Gonkong ákimshiliginiń basshysy Djon Lımen kezdesti. Taraptar Qazaqstan men Gonkong arasyndaǵy saýda-ekonomıkalyq yntymaqtastyqtyń aǵymdaǵy jaǵdaıy men damý perspektıvalaryn, sondaı-aq qarjy, tehnologııa jáne ınnovatsııa salalaryndaǵy ózara is-qımyldy keńeıtý máselelerin talqylady.
Sapardyń iskerlik baǵdarlamasynyń jalǵasy retinde Qanat Bozymbaev pen Djon Lı Gonkongtyń iri ınvestıtsııalyq qorlarynyń, qarjy ınstıtýttarynyń, tehnologııalyq kompanııalary men iskerlik qaýymdastyqtarynyń ókilderin biriktirgen Alatau City Roadshow ınvestıtsııalyq dóńgelek ústeline qatysty.
Qatysýshylardyń nazaryna Memleket basshysynyń tapsyrmasy boıynsha qurylyp jatqan jańa ekonomıkalyq ósý ortalyǵy — Alatau City-diń ınvestıtsııalyq áleýeti usynyldy. Sonymen qatar arnaıy quqyqtyq rejımniń múmkindikteri, ınvestorlardy memlekettik qoldaý sharalary, sondaı-aq qarjy, tsıfrlyq tehnologııalar, jasandy ıntellekt, Web3-ındýstrııasy jáne ınnovatsııalyq qalalyq ınfraqurylym salalaryndaǵy yntymaqtastyqtyń perspektıvalyq baǵyttary tanystyryldy.
Іs-sharaǵa qatysýshylar aldynda sóz sóılegen Qanat Bozymbaev Qazaqstannyń Gonkongty Azııadaǵy jetekshi halyqaralyq qarjy ortalyqtarynyń biri jáne ınvestıtsııalar, tehnologııalar men quzyretterdi tartý úshin mańyzdy alań retinde qarastyratynyn atap ótti. Gonkong kompanııalary men qarjy ınstıtýttarynyń Alataý qalasyndaǵy jobalardy júzege asyrýǵa qatysý perspektıvalaryna erekshe nazar aýdaryldy.
— Gonkong álemdik qarjy júıesinde erekshe oryn alady jáne halyqaralyq ınvestıtsııalar, kapıtaldy basqarý jáne transshekaralyq jobalardy júzege asyrý úshin negizgi alańdardyń biri bolyp qala beredi. Dál sondyqtan biz úshin Alataý jobasyn Gonkongtyń ınvestıtsııalyq jáne iskerlik qoǵamdastyǵyna tanystyrý mańyzdy. Qazaqstan tarıhynda alǵash ret túsinikti qaǵıdalarǵa, ınvestorlardyń quqyqtaryn qorǵaýǵa, sondaı-aq retteýdiń úzdik halyqaralyq standarttaryna basymdyq bere otyryp, Gonkongta qoldanylatyn tásildermen kóp jaǵdaıda úndes keletin arnaıy quqyqtyq rejımi bar qala qurylyp jatyr, — dedi Qanat Bozymbaev.
Óz kezeginde Gonkong ákimshiliginiń basshysy Djon Lı seriktestikti keńeıtýge múddeliligin atap ótip, eki taraptyń bıznes-qoǵamdastyqtary arasyndaǵy tikeleı baılanystardy damytýǵa qoldaý bildirdi.
— Qazaqstan ekonomıkasy 6,5% deńgeıinde turaqty ósim kórsetýde. Men el damýynyń serpinine jáne iskerlik belsendiliktiń joǵary deńgeıine tikeleı kóz jetkize aldym. Júrgizilip jatqan reformalar, ashyqtyq jáne ınvestorlarǵa degen kózqaras odan ári yntymaqtastyq úshin biregeı múmkindikter jasaıdy. Biz seriktestik baılanystardy nyǵaıtý úshin osy oń serpindi paıdalanýǵa umtylamyz, — dep atap ótti ol.
Dóńgelek ústel aıasynda Alatau City Authority men tsıfrlyq tehnologııalar jáne ınnovatsııalar salalaryndaǵy jetekshi korporatsııalar arasynda yntymaqtastyq týraly 6 kelisimshart pen memorandýmǵa qol qoıyldy. Alataýǵa ınvestıtsııa salýǵa Alipay tsıfrlyq júıesin qamtıtyn ANT Digital Technologies iri fınteh-kompanııasy erekshe qyzyǵýshylyq tanytty. Budan basqa, Alataý sıtı jobalaryna bastapqy kezeńde qatysýǵa Web3 tehnologııalary men tsıfrlyq aktıvterdi damytý salasyndaǵy jetekshi halyqaralyq uıymdardyń biri — Solana Foundation da sheshim qabyldady. Qujat Alatau City ınnovatsııalyq ekojúıesin damytý, zamanaýı tsıfrlyq sheshimderdi engizý, tehnologııalyq startaptardy qoldaý jáne blokcheın-tehnologııalar salasynda mamandar daıarlaý boıynsha ózara is-qımyldy kózdeıdi. Іs-sapar aıasynda Dasco Capital jáne Templewater kompanııalary arasynda Qazaqstan men Ortalyq Azııa ekonomıkasyna ınvestıtsııa salý úshin birlesken tikeleı ınvestıtsııalar qoryn qurý jónindegi memorandýmǵa qol qoıyldy. Alataý Sıtı jobalary jańa qordyń ınvestıtsııa salýdaǵy basym baǵyttarynyń biri bolady.
Baǵdarlama is-sharalarynyń bólek bir bóligi — Qanat Bozymbaevtyń Gonkongtiń «bıznes kapıtandarymen», ıaǵnı, Henderson Land, Far East Consortium, Sunwah Group, Bosera Asset Management jáne óńirdiń basqa da iri ınvestıtsııalyq qorlarynyń, qarjy ınstıtýttary men korporatsııalarynyń quryltaıshylarymen kezdesýi boldy. Halyqaralyq ınvestorlar seriktestikke jáne Alataý qalasynyń aýmaǵynda birlesken jobalardy júzege asyrýǵa daıyn ekendikterin bildirdi.
Qazaqstandyq delegatsııanyń Gonkongqa jumys sapary Alatau City-diń ınvestıtsııalyq áleýetin halyqaralyq arenada ilgeriletýdiń mańyzdy kezeńi boldy. Qol jetkizilgen ýaǵdalastyqtar Alataý qalasynyń aýmaǵynda strategııalyq jobalardy júzege asyrýda ınvestıtsııalar, tehnologııalar men halyqaralyq seriktesterdi tartý úshin qosymsha múmkindikter jasaıdy.
Osyǵan deıin Qazaqstan men Gonkong arasyndaǵy taýar aınalymy 178,8 mln dollarǵa jetkenin jazdyq.
