Gonkongta 330 myń dollarlyq tonaý isi boıynsha alty adam qamaýǵa alyndy

ASTANA. KAZINFORM — Gonkong polıtsııasy senbi kúni Sheng-Van aýdanynda bolǵan tonaý oqıǵasy boıynsha alty adamnyń ustalǵanyn habarlady. Atalǵan qylmys barysynda 51 mıllıon ıen kóleminde qolma-qol aqsha (shamamen 330 myń AQSh dollary) urlanǵan, dep jazady Xinhua agenttigi.

Qamaýǵa alynǵandar — bes er adam men bir áıel. Olardyń barlyǵy tonaý qylmysyn jasady degen kúdikke ilingen. Polıtsııa qosymsha tutqyndaýlar bolýy múmkin ekenin joqqa shyǵarmaıdy.

Quqyq qorǵaý organdarynyń málimetinshe, juma kúni tańerteń japondyq baǵaly metaldarmen saýda jasaıtyn kompanııanyń eki qyzmetkeri Sheng-Vandaǵy Des-Ve-Roýd-Sentral kóshesinde valıýta aıyrbastaý úshin 190 mıllıon ıen alyp júrgen. Sol sátte eki er adam olardyń qolyndaǵy ishinde 51 mıllıon ıen bolǵan rıýkzakty julyp alyp, avtokólikke minip, oqıǵa ornynan qashyp ketken.

Alty saǵattan keıin Gonkongtyń halyqaralyq áýejaıynda tonaýǵa qatysy bar degen kúdikke ilingen eki adam — Japonııa azamattary jáne olardyń sybaılasy ustaldy. Olardyń janynan urlanǵan aqshanyń 4,6 mıllıon ıeni tabylǵan. Keıinirek krıptovalıýta bırjasynda jumys isteıtin taǵy eki er adam qamaýǵa alyndy. Olar urlanǵan qarajatty qolma-qol aqshaǵa aınaldyrýǵa kómektesti degen kúdikke ilingen.

Buǵan deıin Tokıonyń ortalyǵynda da atyshýly tonaý oqıǵasy bolǵany habarlanǵan edi. Ol kezde qylmyskerler ishinde 420 mıllıon ıen (shamamen 2,7 mıllıon AQSh dollary) bar chemodandarmen qashyp ketken. Zardap shekkender bul aqshany Haneda áýejaıynan Gonkongqa jetkizip, ıendi gonkong dollaryna aıyrbastaýdy josparlaǵandaryn aıtqan.