Gonkong JI-di memlekettik sektorǵa tranformatsııalaý úshin mıllıardtaǵan ınvestıtsııa salyp jatyr

ASTANA. KAZINFORM – Gonkongtiń Arnaıy avtonomdyq aýdany úkimetiniń qarjy hatshysy sársenbi kúni óńirdi jasandy ıntelektini jahandyq damytý ortalyǵyna aınaldyrý jónindegi jospary týraly málimdedi, dep habarlaıdy Kazinform-nyń Beıjińdegi arnaýly tilshisi.

2026–2027 jyldarǵa arnalǵan bıýdjet jospary boıynsha baıandamada qarjy vedomstvosynyń basshysy maqsatqa jetý úshin «AI+» jáne ónerkásipti damytý strategııasy jónindegi komıtet quryp, oǵan jeke ózi jetekshilik etetinin málimdedi. Úkimet iri tildik modelder, jańa materıaldar jáne bıomedıtsına baǵytyndaǵy ázirlemelerdi sýbsıdııalaýǵa 3 mlrd gonkong dollaryn (383,6 mln AQSh dollary) bóldi.

2026 jyldyń ekinshi jartysynda Hong Kong Artificial Intelligence Research and Development Institute operatsııalyq qyzmetin bastaıdy. Instıtýt ǵylym men bıznes arasyndaǵy kópir qyzmetin atqaryp, ǵylymı zertteý jáne tájirıbelik konstrýktorlyq jumystardyń (ǴZTKJ) nátıjelerin kommertsııalandyrýǵa jáne tsıfrlyq ortadaǵy erejelerdi qalyptastyrýǵa qatysady.

Sendı-Rıdj aýmaǵynda jalpy aýdany 250 myń sharshy metr bolatyn derekterdi óńdeý ortalyqtary klasterin iske qosý josparlanǵan. Infraqurylymdyq baza daıyndalyp jatyr.

Kıberqaýipsizdikke basymdyq berilgen. Hong Kong Monetary Authority bank sektoryn avtomattandyrylǵan shabýyldardan qorǵaý úshin «AI-ǵa qarsy AI» tujyrymdamasyn synaqtan ótkize bastady. Bılik jastar men turǵyndardy oqytýǵa 50 mln gonkong dollaryn (shamamen 6,4 mln AQSh dollary) bólmek. Aýqymdy tsıfrlandyrý sharalary qala turǵyndarynyń ómirine de áser etedi.

Memlekettik qyzmettiń tsıfrlyq transformatsııasyn jedeldetýge 100 mln gonkong dollary (shamamen 12,8 mln AQSh dollary) qarastyrylǵan. Negizgi baǵyttar: jol qozǵalysyn JI arqyly monıtorıngteý jáne basqarý, kadr irikteý úderisterin ońtaılandyrý, kóshkin qaýpin taldaý jáne sý tasqynyn boljaý.

Osyǵan deıin Gonkongtiń generatıvti JI-di jańa salalar boıynsha keńeıtip jatqany týraly jazdyq.