Gonkong tumaýy: dárihanalarda vırýsqa qarsy preparattar tapshylyǵy bar

ASTANA. KAZINFORM - Qazaqstanda maýsymdyq tumaýdyń asqynǵan túri tarap, ásirese balalar arasynda aýrýshańdyq ósip otyr. Densaýlyq saqtaý mınıstrligi jaǵdaıǵa baılanysty arnaıy brıfıng ótkizip, el arasynda «Gonkong tumaýy» dep atalyp ketken vırýsqa qatysty túsinikteme berdi, dep málimdedi Jibek Joly telearnasynyń «Jańa ýaqyt» baǵdarlamasy.

Vedomstvonyń málimetinshe, bul — qalypty tumaýdyń asqynǵan túri, al el boıynsha atalǵan vırýsty juqtyrǵandar sany kóp emes. Sońǵy jeti kúnde elde tumaýdyń aýyr túrin juqtyrǵandar sany 200 myńǵa jýyqtaǵan.

Mamandardyń aıtýynsha, Gonkong vırýsynyń ereksheligi — dene qyzýy kúrt kóterilip, aptalap túspeı qoıady, qurǵaq jótel, tamaqtyń aýyrýy, aıaq-qoldyń syrqyraýy, tersheńdiktiń basylmaýy, sondaı-aq bastyń qatty aýrýy. Aýrýhanalarǵa dál osyndaı belgilermen kelip jatqan balalar sany kúrt artqan. Birqatar medıtsınalyq uıymdarda oryn tapshylyǵy sezilýde.

Qazir vırýsqa qarsy dári retinde dárigerler flýkap jáne flývır preparattaryn usynyp otyr. Alaıda olardy tabý qıynǵa soǵady. Turǵyndardyń aıtýynsha, kóptegen kúndiz-túni jumys isteıtin dárihanalarda bul dáriler joq.

Almaty turǵyny Nazym Qorǵanova dárini taba almaǵannan keıin, basqa qaladaǵy dárihanalarǵa habarlasýǵa májbúr bolǵanyn aıtty.

— Astanadaǵy barlyq táýlik boıy jumys isteıtin dárihanalarǵa habarlastym, esh jerde joq. Sosyn Pavlodardaǵy bes dárihanaǵa qońyraý shaldym. Solardyń birinen ǵana eki qaptamasyn áreń taptym. Pedıatr alǵashqy eki kúnde berse, jaqsy áser etedi dedi. Shynymen, kelesi kúni qyzýy kóterilgen joq, — dedi ol.

Densaýlyq saqtaý mınıstrligi Medıtsınalyq jáne farmatsevtıkalyq baqylaý komıtetiniń tóraǵasy Baýyrjan Júsipov preparat tapshylyǵy bar ekenin rastady.

— Bizde dáriniń jalpy eki aılyq qory bar. Biraq flýkap pen flývırge suranys sońǵy ýaqytta birden artty. Іri dárihanalarmen jáne dıstrıbıýtorlarmen sóılestik. Búgin-erteń úlken kólemde dári jetkiziledi. Qazirdiń ózinde keıbir jeliler flývırdiń 200, flýkaptyń 400 qaptamasyn satylymǵa shyǵardy, — dedi ol.

Brıfıng barysynda mınıstrlik ókilderi alypsatarlardyń áreketi de tapshylyqqa sebep bolýy múmkin ekenin joqqa shyǵarmady. Úkimet osy máseleni baqylaýǵa alǵanyn málimdedi.

Úkimet otyrysynda Densaýlyq saqtaý mınıstri Aqmaral Álnazarova jaǵdaıǵa toqtalyp, elde vırýsqa qarsy jáne qyzý túsiretin preparattardyń, jeke qorǵanysh quraldarynyń, dezınfektsııalyq zattardyń jetkilikti qory bar ekenin aıtty.

— Qajetti preparattar tolyq kólemde qamtamasyz etiledi, — dedi mınıstr.

Mamandardyń boljamynsha, tumaýdyń taralý qarqyny jeltoqsan aıynyń ortasynda báseńdeı bastaıdy.

Qaýipsizdik maqsatynda eldegi 7 óńirdiń 132 mektebi ýaqytsha qashyqtan oqytý formatyna aýystyryldy. Al oflaın rejımde jumys istep turǵan mektepterde balalardyń temperatýrasyn kún saıyn ólsheý, qosymsha dezınfektsııa júrgizý talaptary kúsheıtildi.

Aıta keteıik, ınfektsıonıst balalar arasynda tumaý nege aýyr júrip jatqanyn túsindirdi.