Gonkong generatıvti JI-di jańa salalar boıynsha keńeıtip jatyr

ASTANA. KAZINFORM – Gonkongtyń Valıýta basqarmasy (HKMA) basqa qarjy retteýshilerimen aldaǵy bes jylda qarjylyq tehnologııalardy damytý jáne jasandy ıntellektini ekonomıkanyń túrli salalaryna engizý boıynsha kelissóz júrgizip jatyr, dep habarlaıdy South China Morning Post.

Bul bastama Fintech 2030 bes jyldyq josparynyń aıasynda júzege asyrylyp jatyr. Osy jospardyń bóligi retinde HKMA qalanyń generatıvti JI «qumsalǵyshyn» keńeıtip, ony jańa salalarǵa taratýǵa nıetti. Bul táýekelderdi basqarý sapasyn, alaıaqtyqty anyqtaý tıimdiligin jáne tutynýshylarǵa qyzmet kórsetý deńgeıin jaqsartady dep kútilip otyr.

- Túrli sektorlar tarapynan kózqarastyń ártúrliligi, ásirese jasandy ıntellekt sııaqty tez damyp kele jatqan salada shyǵarmashylyq jáne tıimdirek sheshimderge ákelýi múmkin. Túrli sektorlardyń sondaı-aq JI modelderin oqytý jáne jetildirý úshin paıdaly bolýy múmkin derek túrleri bar, - dep atap ótti NKMA basshysy Eddı ıÝe Vaıman.

Onyń aıtýynsha, bastamany qamtý aıasyn keńeıtý jáne salanyń keńirek qatysýyn yntalandyrý úshin Saqtandyrý basqarmasy jáne Baǵaly qaǵazdar jáne fıýcherster komıssııasy sııaqty negizgi qarjylyq retteýshilermen konsýltatsııalar jalǵasyp jatyr.

Buǵan deıin Qazaqstan Prezıdenti Q.Toqaev 2026 jyldy Tsıfrlandyrý jáne jasandy ıntellekt jyly dep jarııalaǵanyn habarlaǵan bolatynbyz.