Gondýrastyń eks-prezıdenti esirtki barondarymen sybaılasqany úshin ómir boıyna sottalýy múmkin
ASTANA. KAZINFORM - Gondýrastyń burynǵy prezıdenti Hýan Orlando Ernandes Nıý-Iorkte esirtki satýshylarmen sóz baılasqany úshin kináli dep tanyldy, dep jazady Euronews.
Ol ómir boıyna bas bostandyǵynan aıyrylýy múmkin.
Gondýrastyń burynǵy prezıdenti Hýan Orlando Ernandes esirtki satýshylarmen kelisip, tonnalaǵan kokaındi AQSh-qa kedergisiz kirgizý úshin óziniń áskerı jáne ulttyq polıtsııasyn paıdalanǵan.
Mundaı úkimdi Nıý-Iork federaldy sotynda alqabıler soty shyǵardy.
Bul aıyp boıynsha eń tómengi jaza — 40 jylǵa bas bostandyǵynan aıyrý, al eń qata jaza — ómir boıyna sottaý.
Úkim 26 maýsymda shyǵady, biraq Ernandestiń advokaty Sabrına Shroff apellıatsııalyq shaǵym beretinin málimdedi.
Óz kezeginde prokýror Demıan Ýılıams óz málimdemesinde aıyptaý úkimi «osyǵan uqsas jolmen júrgisi keletin búkil jemqor saıasatkerlerge eskertý bolady» dep úmittendi.
Ol Ernandestiń «ózi týyp-ósken Gondýrastyń ómirin jarqyn jaqqa ózgertýge búkil múmkindigi bolǵanyn» aıtty.
«Onyń ornyna óz ustanymy men elin jeke basynyń paıdasyna paıdalanyp, álemdegi eń iri jáne qatygez esirtki satatyn uıymdarmen sybaılasty».
55 jastaǵy Ernandes eki merzim boıy Gondýras prezıdenti boldy — 2014 jyldan 2022 jylǵa deıin.
Ol el astanasy Tegýsıgalpadaǵy úıinde qyzmetinen ketkennen keıin úsh aıdan keıin qamaýǵa alynyp, sol jyly sáýirde AQSh-qa ekstradıtsııalandy.
Amerıkalyq prokýrorlar Ernandesti 2004 jyldan beri esirtki satýshylarmen yntymaqtasty dep aıyptaǵan. Sóıtip mıllıondaǵan para alyp, aýyl kongressmeninen Ulttyq kongress prezıdentine, sodan keıin eldegi eń joǵary laýazymǵa deıin kóterildi dep málimdedi.
Sotta aıtqan ózinde Ernandes esirtki barondarynan aqshany Gondýrastyń barlyq derlik saıası partııalary alǵanyn málimdedi, biraq ózi almadym dedi.
Aıtýynsha, onyń aıyptaýshylary óz qylmysyn jasyrýǵa tyrysyp, bar aıypty osyǵan japqan.
«Olardyń bárinde ótirik aıtýǵa motıvatsııa bar, olar — kásibı ótirikshiler», — dedi Ernandes.
Sot otyrysynda kýágerlerdiń qatarynda esirtki satýshylar da boldy.
Olar ondaǵan kisi ólimine ózderi jaýapty ekenin moıyndady jáne Ernandes álemdegi eń yqpaldy kokaın dılerlerin erekshe yntamen qorǵady dep málimdedi. Onyń ishinde AQSh-ta ómir boıyna sottalǵan ataqty meksıkalyq esirtki ıesi Hoakın «El Chapo» Gýzman da bar.
