Gondýrasta eki kúnniń ishinde jappaı kisi óltirý oqıǵalary oryn aldy
ASTANA. QazAqparat - Gondýras astanasy Tegýsıgalpy mańynda sársenbi kúni keminde jeti adam óltirildi, dep habarlady RIA Novostı agenttigi jergilikti qaýipsizdik mınıstrligine silteme jasap.
Vedomstvo ókiliniń aıtýynsha, qylmyskerler birneshe turǵyndardyń úılerine basyp kirip, olardy kóshege súırep shyǵaryp, atyp tastaǵan. Óltirilgender 18-den 36 jasqa deıingi adamdar. El Heraldo portalynyń atap ótýinshe, buǵan jergilikti bandylardyń aýmaqtarǵa baqylaý ornatý úshin qatynastaryn aıqyndaý sebep bolǵan tárizdi.
Bul jappaı kisi óltirý ortalyqamerıkandyq eldegi sońǵy eki kúndegi ekinshi osyndaı oqıǵa bolyp otyr. Seısenbi kúni qaskóıler Choloma qalasyndaǵy avtobýs stansasyn atqylap, sol jerde segiz adamdy jer jastandyrǵan bolatyn.
Gondýrastaǵy qylmys pen zombylyq - álemdegi eń joǵary kórsetkishke jetken. BUU esirtki jáne qylmys jónindegi basqarmasy Gondýrastyń 100 myń halqyna 90,4 kisi óltirýden keletinin atady. Sonyń ishinde barlyq kisi óltirýlerdiń 70 paıyzy esirtki aǵynymen baılanysty.
