Gondýrasta 16 jasar kelinshek bir kún kórde jatyp kómek suraǵan
ASTANA. QazAqparat - Ortalyq Amerıkada ornalasqan Gondýras Respýblıkasynda adam aıtsa sengisiz oqıǵa boldy. Ata-anasy, týǵan-týysy ólip qaldy dep kómgen 16 jastaǵy Neısı Perestiń kúıeýi bir kúnnen keıin marqum kelinsheginiń kórde jatyp kómek suraǵan daýysyn estıdi. Bul týraly The telegraph agenttigi jazyp, týǵan-týysqandary Neısı Peresti qaıta qazyp alǵan sáti kórsetilgen jantúrshigerlik vıdeony usynǵan.
Derek kózine súıensek, Neısı Peres jýyrda turmysqa shyqqan jáne qursaǵynda úsh aılyq náreste kóterip júrgen. Neısı turatyn aýdanda atys bolsa kerek, ol oqtyń daýysynan shoshyp, esinen tanyp qalǵan. Onyń aýzynan aq kóbik aǵyp jatqanyn kórgen ata-anasy qyzynyń boıyna «jyn-shaıtan» kirip ketti dep oılap, shirkeý qyzmetkerin kómekke shaqyrady. Biraq úsh saǵattan keıin dárigerler Neısı Perestiń júregi toqtaǵanyn aıtady. Qaıǵy jutqan otbasy jýyrda ǵana turmysqa shyqqandyqtan, Neısıdi aq kóılek kıgen qalpynda jerleıdi. Jerleýden keıin 24 saǵat óte áıeliniń kórine qaıta barǵan Rýdı Gonsales onyń aıqaılap, kómekke shaqyrǵan daýysyn estıdi. «Men onyń daýysyn estidim, ol kórdi urǵylap, kómekke shaqyrdy», - deıdi ol. Kórdi qazǵan shirkeý qyzmetkerleri men qyzdyń týǵan-týysy Neısıdiń denesi jyp-jyly kúıinde jatqanyn jáne kórdiń bir shetindegi shynynyń synǵanyn kórip, ózderi esten tana jazdaǵan. Ony jedel túrde aýrýhanaǵa jetkizgenmen, Neısı qaıtadan kóz jumdy. Dárigerler bolsa, Neısı birinshi ret «ólgen» kezde, qatty qoryqqannan júregi ýaqytsha toqtap qalǵanyn, al kórden qaıta shyqqan kelinshek rasymen endi ómirge kelmeıtinin aıtyp, ata-anasyna kóńil aıtqan. Týǵan-týysy Neısı Peresti ekinshi ret jerlegen.
