Gondýras prezıdenttigine úmitker Trampty saılaýǵa aralasty dep aıyptady

ASTANA. KAZINFORM — Gondýrastyń Bostandyq jáne Qaıta qurý basqarýshy partııasynan prezıdenttikke kandıdat Rıksı Monkada AQSh prezıdenti Donald Trampty aıyptady, dep habarlaıdy TASS. 

Monkada Donald Tramptyń óziniń básekelesterin qoldaıtyn sońǵy málimdemelerin eldiń ishki isine aralasý jáne saılaý aldyndaǵy tynyshtyqty buzý dep sanaıtynyn aıtty.

— Nege saılaýǵa úsh kún qalǵanda AQSh prezıdenti eki partııalyq júıeniń kandıdatyn jaqtap eki málimdeme jasap otyr? Óıtkeni ol jeńiliske ushyrady, onyń qýyrshaq kandıdattary sátsizdikke ushyrady. Ol jeńiliske ushyraǵandyqtan, únsizdikti buzdy, — dep jazdy óziniń partııasynyń paraqshasynda.

Monkada óziniń saılaýaldy baǵdarlamasy ekonomıkany demokratııalandyrýǵa, salyq ádildigi týraly zań qabyldaýǵa jáne nesıe júıesin jeńildetýge baǵyttalǵandyqtan, ol úlken qoldaýǵa ıe ekenin atap ótti. 

Buǵan deıin AQSh prezıdenti Donald Tramp Ortalyq Amerıka eliniń turǵyndaryn jeksenbi kúni ótetin saılaýda Ulttyq partııanyń kandıdaty Nasrı Asfýraǵa daýys berýge shaqyrǵan. Tramp Asfýra jeńiske jetken jaǵdaıda Vashıngtonnyń Gondýrasty tolyq qoldaıtynyna ýáde berdi. Sondaı-aq ol AQSh-ta esirtki saýdasymen aınalysty degen aıyppen 45 jyl jazasyn ótep jatqan Asfýranyń partııalas múshesi, Gondýrastyń burynǵy prezıdenti Hýan Orlando Ernandesti keshiremin dep sóz bergen.

Aıta keteıik, Donald Tramp Venesýela ústinen áýe keńistigin jabatynyn jarııalaǵan bolatyn.