Golovkınniń judyryqtasýy mindetti qarsylasy belgilendi

ASTANA. QazAqparat - Dúnıejúzilik boks qaýymdastyǵy (WBA) óziniń orta salmaqtaǵy «sýper chempıony» Gennadıı Golovkınge (42-2-1, 37 KO) mindetti úmitkermen, osy sanattaǵy «qarapaıym» beldiktiń ıesi kýbalyq Erıslandı Laramen (29-3-3, 17 KO) jekpe-jek taǵaıyndaý týraly qaýly shyǵardy, dep habarlaıdy QazAqparat Sports.kz saıtyna silteme jasap.

Taraptarǵa kelissózge 30 kún berildi – 2022 jyldyń 23 qyrkúıeginen 23 qazanyna deıin. Golovkın - Lara jekpe-jegi orta dıvızıondaǵy jalǵyz WBA álem chempıonyn anyqtaıdy.

Buǵan deıin WBA Gennadııge ekinshi orta salmaqqa ótip, Saýl «Kanelo» Alvarespen osy sanattaǵy absolıýtti álem chempıony ataǵy úshin talasýǵa arnaıy ruqsat bergen bolatyn. Biraq, ol orta salmaqqa qaıta oralyp, Laramen kezdesýi tıis degen shart qoıdy.

GGG — «Kanelo» III jekpe-jegi 18 qyrkúıekte ótip, tóreshilerdiń biraýyzdan sheshimimen meksıkalyqtyń jeńisimen aıaqtaldy.

Eger belgilengen merzimde Golovkın men Lara jekpe-jek týraly kelise almasa, GGG paıdasyna 75%-dan 25%-ǵa deıingi araqatynasta kiristerdi bóle otyryp, promoýterlik saýda-sattyq taǵaıyndalady.