Golovkınniń jeńisine senetinder azaıyp keledi - saýalnama
ASTANA. QazAqparat - Boxing Kingdom kezekti saýalnamanyń qorytyndysyn jarııalady. Saıttyń oqyrmandary Gennadıı Golovkın (37-0, 33 KO) men Saýl Alvares (49-1-1, 34 KO) arasyndaǵy jekpe-jektiń jeńimpazyn tańdaǵan bolatyn, dep xabarlaıdy QazAqparat tilshisi.
Portaldyń málimetine sáıkes, GGG-diń jeńisine senetin fanattardyń sany azaıyp keledi. Sebebi alǵashqy saýalnamada jankúıerlerdiń 80 paıyzy Gennadıı Golovkınge, al qalǵan 20 paıyzy Saýl Alvareske daýys berse, aǵymdaǵy jyldyń basynda atalǵan kórsetkish 60/40 bolyp ózgerdi. Sońǵy saýalnama boıynsha Golovkınniń jeńisine senetinder 57 paıyzǵa deıin tómendedi. "Kaneloǵa" fanattardyń 43 paıyzy daýys bergen.
Aıta keteıik, Golovkın-Alvares jekpe-jegi 16 qyrkúıekte AQSh-tyń Las-Vegas qalasynda ótedi. Qazirdiń ózinde barlyq bıletter satylyp ketken. Ýaqyt aıyrmashylyǵyna baılanysty atalǵan jekpe-jek Qazaqstanda 17 qyrkúıek kúni tańerteń kórsetiledi.
