Golovkınniń jekpe-jegi týraly aıtqan basqarma basshysyna eskertý jasaldy

ASTANA. QazAqparat - Astana qalasynyń ákimdigi Gennadıı Golovkınniń jekpe-jegin ótkizý týraly aqparatty joqqa shyǵardy, dep xabarlaıdy QazAqparat tilshisi.

«Elorda ákimdigi 2017 jyldyń 17 shildesinde Gennadıı Golovkınniń jekpe-jegi ótetini týraly aqparat shyndyqqa sáıkes kelmeıtinin habarlaıdy. Ákimdik atalǵan sharanyń resmı uıymdastyrýshysy bolyp tabylmaıdy jáne atalǵan boks keshin ótkizý sharttary boıynsha aqparattan habarsyz. Shyndyqqa janaspaıtyn aqparat bergeni úshin Astana qalasynyń dene shynyqtyrý jáne sport basqarmasynyń basshysy Berik Marjyqpaevqa eskertý jasaldy», - delingen resmı xabarlamada.

Aıta keteıik, búgin Astanada ótken baspasóz máslıxatynda Astana qalalyq dene shynyqtyrý jáne sport basqarmasynyń basshysy Berik Marjyqpaev qazaqstandyq boksshy Golovkınniń Astanadaǵy jekpe-jegi shildeniń 17-si kúni ótedi dep málimdedi.

Alaıda GGG komandasy ol aqparatty joqqa shyǵardy.