Golovkınniń jekpe-jegi ótetin kún belgili boldy
ASTANA. QazAqparat - Los-Andjeleste WBA tujyrymy boıynshy álem chempıony Gennadıı Golovkın men onyń promoýteri Tom Lefflerdiń qatysýmen baspasóz máslıhaty ótti, dep habarlaıdy kazsporttv.kz.
Baspasóz máslıhatynda Golovkınniń kelesi jekpe-jegi 26 shildede Nıý-Iork qalasynyń Madison Square Garden (MSG) arenasynda ótetini belgili boldy. Jekpe-jekti HBO telearnasy kórsetedi.
Tom Lefflerdiń aıtýy boıynsha, álemniń eks-chempıony Denıel Gıldiń ókili Gerı Shoýmen kelissózder júrip jatyr. Esterińizde bolsa, Dúnıejúzilik boks qaýymdastyǵy (WBA) Golovkındi avstralııalyq Djarod Fletchermen jekpe-jekke shyǵýǵa mindettegen edi. Bul sheshimge Golovkınniń komandasy rıza emestigin bildirip, qaýymdastyq basshylyǵyna Denıel Gılmen jekpe-jek ótkizýge múmkindik berý jóninde ótinish joldady. Tom Leffler 26 shildege josparlanǵan jekpe-jektiń ótetinine senetinin aıtty.
Golovkın men Gıl arasyndaǵa kelissózder sátti aıaqtalsa, jekpe-jek MSG-niń 20 myń adamǵa arnalǵan arenasynda ótedi. Qazaqstandyq boksshynyń aldyńǵy kezdesýleri Madison Square Garden-niń 5600 kórermen syıatyn teatrynda ótken bolatyn.
Aıta keter jaıt, Golovkın ekinshi orta salmaqqa aýysýǵa jáne osy salmaqtaǵy boksshylarmen jekpe-jekke shyǵýǵa daıyn ekenin málimdedi. Boksshynyń komandasy da bul bastamaǵa qarsy emes. Gennadıı Golovkın 31 mamyr kúni, WBA men IBF biriktirilgen Karl Froch pen Djordj Groývs jekpe-jeginiń jeńimpazymen jáne osy dıvızonnyń myqty boksshysy sanalatyn Andre Ýordpen de jekpe-jekke shyǵýǵa ázir ekenin aıtýda.
