Golovkınniń jańa bapkeri onyń bokstan qashan ketetindigine qatysty aıtty

NUR-SULTAN. QazAqparat - Gennadıı Golovkınniń bapkeri Djonaton Benks qazaqstandyq boksshynyń keleshegine qatysty birqatar boljamdarǵa núkte qoıdy, dep habarlaıdy QazAqparat Sports.kz saıtyna silteme jasap.

«Golovkın orta salmaq sanatynda qalady. Odan joǵarylaýdyń qajeti joq - ol naǵyz orta salmaq boksshysy. Oǵan qazirgi ornynda jaıly», - dedi ol.

Al GGG-diń kásipqoı boksta qansha ýaqyty qalǵany týraly suraqqa: «Kózimmen kórgenim boıynsha aıtar bolsa, áli aıtarlyqtaı kóp ýaqyt bar. Qazir ol naǵyz babynda», - dep jaýap qaıyrdy.

Qazaqstandyq sportshy burynǵy bapkeri meksıkalyq Abel Sanchespen jumysyn toqtatqany týraly buǵan deıin habarlaǵan bolatynbyz.

Orta salmaqtaǵy burynǵy álem chempıony Gennadıı Golovkın (38-1-1, 34 KO) aldaǵy 8 maýsymda Nıý-Iorktegi (AQSh) Madison Square Garden arenasynda 35 jastaǵy kanadalyq boksshy Stıv Rollspen (19-0, 10 KO) kezdesedi. Ol sońǵy jekpe-jegin 2018 jyldyń 15 qyrkúıeginde ótkizip, tóreshilerdiń basym sheshimimen meksıkalyq Saýl Alvaresten (51-1-2, 34 KO) jeńilip qaldy.

Rolls sońǵy ret 15 jeltoqsanda rıngke shyǵyp, tóreshilerdiń sheshimimen amerıkalyq Keandr Lezervýdty (21-6-1, 13 KO) jeńgen edi. Ol osy ýaqytqa deıin birde-bir ret jeńilmegen. 19 jekpe-jekti 10 ret nokaýtpen aıaqtaǵan.