Golovkınniń promoýteri taǵy bir qarsylastyń atyn atady
ASTANA. QazAqparat - WBA jáne IBO nusqalary boıynsha orta salmaqta bokstan álem chempıony qazaqstandyq Gennadıı Golovkınniń promoýteri Tom Leffler meksıkalyq Hýlıo Sezar kishi-Chavespen jekpe-jekten soń amerıkandyq Kellı Pavlıkpen arada tartysty kezdesýdi uıymdastyrý óte oryndy bolatynyn málim etti.
Bul týraly Vesti.kz jazdy.
Atap aıtqanda, WBC jáne WBO nusqalary boıynsha orta salmaqta eks-chempıon Kellı Pavlık Feısbýk áleýmettik jelisi arqyly Gennadıı Golovkınmen jekpe-jektiń bolýy múmkindigi jaıynda óziniń oqyrmandarymen pikir almasqan eken.
«The Sweet Science» jýrnalısteriniń biri Tom Lefflerge osy taqyrypta saýal qoıdy.
«Qazirgi kezde Golovkın men Chaves arasyndaǵy jekpe-jek boıynsha jumystar júrip jatyr. Osydan keıin Pavlıkpen qolǵap túıistirse, óte oryndy bolar edi»,-dedi Golovkınniń promoýteri.
Basylymnyń jazýynsha, 32 jasar amerıkandyq boksshynyń sońǵy jekpe-jegi 2012 jyldyń jazynda ótken bolatyn. Al densaýlyǵyna baılanysty sporttyq mansabyn aıaqtaıtyndyǵy jaıyn ol 2013 jyldyń qańtarynda málimdegen edi.
