Golovkınniń promoýteri: Revansh boıynsha kelissózder zaıa ketýi múmkin

ASTANA. QazAqparat - Qazaqstandyq bylǵary qolǵap sheberi Gennadıı Golovkınniń promoýteri Tom Leffler GGG men Saýl «Kanelo» Alvares arasyndaǵy revansh jónindegi kelissózderdiń sońǵy jańalyqtarymen bólisti, dep jazady Sports.kz.

«Ótken aptada bergen suhbatymda revanshtyń 90% anyq ekenin aıtqan edim. 100%-ǵa áli qol jetkizilgen joq, osy qalǵan 10% búkil kelissózderdi joqqa shyǵarýy da múmkin. Dál qazir Gennadıı Qazaqstanda, sharttyń barlyǵyn kelisý úshin onyń kelýin kútip júrmiz. Eger Golovkın barlyǵyna kelisimin berse, qalǵan is kópke sozylmaıdy dep oılaımyn. Meniń aıtpaǵym, biz kelissóz júrgizdik, revanshty birinshi jekpe-jekten bir aptadan keıin-aq ótkizýimiz múmkin edi. Biraq talqylaýlar tórt aıǵa sozylyp ketti. Qazir jaǵdaı bylaı bolyp otyr, eger taraptardyń biri shartqa kónbese, munda bir gáp bar», - deıdi Leffler Boxingscene.com-ǵa bergen suhbatynda.

Promoýter qańtardyń sońyna deıin búkil kelissózdi aıaqtap, resmı málimdeme jasaýǵa úmit etip otyrǵanyn aıtty.

«Men eshqashan sońǵy merzim aıtqan emespin. Biraq eger qańtardyń sońyna deıin anons bere almasaq, munda keıbir problemalar bar degen sóz», - dedi ol.