Golovkınniń promoýteri «Kanelomen» trılogııa týraly aıtty

ASTANA. QazAqparat - Gennadıı Golovkınniń promoýteri Tom Leffler K.O. Artist Sports-qa bergen suhbatynda Saýl Alvarespen úshinshi aıqasqa qatysty pikir bildirdi, dep habarlaıdy Sports.kz.

«Iá, «Kanelo» DAZN-men kelisimshart jasap, keremet jumys atqardy. Biraq, biz Gennadııge qandaı nusqalar bar ekenin qaraımyz. Sondaı-aq, ESPN jáne basqa da telearnalar qyzyǵýshylyq tanytyp jatyr. Bul týraly men jarııa ete almaımyn. Árıne, bul eki jekpe-jek «Kanelo» úshin de, Golovkınge de eń tabysty boldy. Ol halyqaralyq deńgeıde de jaqsy kórsetkishter kórsetti, kóptegen demeýshilik kelisimder de jasaldy... Sondyqtan, úshinshi aıqastyń ótýine eshqandaı kedergi joq», - dep atap ótti Leffler.

Promoýterdiń aıtýynsha, GGG «Kanelony» eki ret jeńdim dep esepteıdi, sondyqtan úshinshi aıqastyń ótkenin qalamaýyna esh sebep joq.

«Sondaı-aq, jankúıerler Alvarestiń Golovkındi jeńe alatynyn dáleldegenin qalaıdy. Sebebi, ol eki sheshimmen jeńiske qol jetkizdi. Ne bolatynyn kóreıik. Ázirge «Kanelo» jeltoqsanda aıqas ótkizpek. Ony kúteıin dep otyrǵan joqpyz. Sebebi, biz kesteni, aıqastardy qaraımyz. Eger «Kanelomen» úshinshi aıqas ótetin bolsa - tamasha, biz munymen jumys isteımiz», - dedi Leffler.