Golovkınniń promoýteri «Kanelomen» kelissózderde nelikten sheginiske barǵanyn aıtty

ASTANA. QazAqparat - Orta salmaqta WBA Super, WBC jáne IBO tujyrymdary boıynsha álem chempıony Gennadıı Golovkınniń (38-0-1, 34 KO) promoýteri Tom Leffler onyń IBF tıtýlynan aıyrylýynyń jaqsy jaǵy da bar ekenin málim etti, dep habarlaıdy Sports.kz.

Onyń aıtýynsha, bul meksıkalyq Saýl Alvarespen (49-1-2, 34 KO) ekinshi kezdesýdi uıymdastyrý týraly kelissózderdi alǵa jyljytýǵa septigin tıgizgen.

«Gennadıı rematch ótýi úshin 50 paıyz úlesten bas tartýǵa da kóndi. Men GGG-diń kelesi jekpe-jegi týraly oılap jatyrmyn. IBF Golovkındi tıtýlynan aıyryp, jaǵdaıdy azdap jeńildetti. Endi mindetti túrde qorǵaý týraly oılanýdyń  qajeti joq», - deıdi Leffler.

Eske sala keteıik, «Kanelonyń» komandasy 15 qyrkúıekte jekpe-jek ótkizý úshin Las-Vegastaǵy T-Mobile arenasyna tapsyrys bergen. Sol kúni Golovkınmen ekinshi kezdesý bolady dep jurt kútip otyr.