Golovkınniń promoýteri Djeıkobspen aradaǵy kelissózder týraly aıtty
ASTANA. QazAqparat - Boksshy Gennadıı Golovkınniń promoýteri Tom Leffler ESPN-ge bergen suhbatynda amerıkandyq Denıel Djeıkobstyń komandasymen kelissózderdiń qalaı júrgizilip jatqanyn málim etti. Buǵan deıin Búkilálemdik boks qaýymdastyǵy (WBA) promoýterlerge ekijaqty qol qoıylǵan aıqas týraly kelisimshartty alyp kelýleri úshin 7 kún berip, oryndalmaǵan jaǵdaıda jekpe-jektiń promoýterlik saýdaǵa qoıylatynyn aıtqan, dep habarlaıdy Sports.kz.
«Ádette olar talapqa saı 10 kún beretin. Tabysty kelisim jasaımyz dep oılaımyn. El Heımonmen áńgimeleskenimde, Djeıkobstyń jekpe-jekke túskisi keletinin tilge tıek etti, qazirgi tańda jumys jasap jatqan kelisimsharttyń keıbir tarmaqtaryn maquldasý ǵana qaldy», - dedi Leffler.
Golovkın - Djeıkobs aıqasy 10 jeltoqsanda ótýi kerek bolatyn, alaıda boksshylardyń promoýterleri kiristi bólisý máselesin sheship úlgermegendikten, naýryzǵa aýystyrdy.
Eske sala keteıik, reglamentke sáıkes, tólemaqy WBA (Super) tıtýlynyń ıegerine, ıaǵnı Golovkınniń paıdasyna qaraı 75-te 25% bolyp bólinýi tıis. Heımon ony 60/40 dep ózgertýdi suraǵan. WBA olardyń shaǵymdaryn qabyldamady.
