Golovkınniń promoýteri Astanada ótýi múmkin jekpe-jek jaıly pikirin bildirdi
ASTANA. QazAqparat - Gennadıı Golovkınniń promoýteri Tom Leffler olardyń tarapy osy jazda Astanada EKSPO-2017 aıasynda jekpe-jek ótkizý máselesin áli qarastyrmaǵanyn aıtty, dep habarlady Sports.kz.
«Ótken jyly WBC jelisi boıynsha bizge Alvarespen, WBA-dan Djeıkobspen mindetti aıqasty taǵaıyndaýǵa baılanysty qolymyz baılandy. Ótken jyl Gennadıı úshin sátsiz jyl boldy. Sebebi ol jylyna 3-4 ret shyǵyp úırengen. Meniń jumysym aldyn ala qarastyrý, al Golovkın jylyna 3-4 jekpe-jek ótkizý yrǵaǵyna qaıta oralǵysy keledi.
Qazir basty nazar 18 naýryzdaǵy aıqasta. Eger Gennadıı bul aıqasta jeńiske jetpese, kez kelgen jospar iske aspaı qalýy múmkin. Biz tıtýldardy jınaýda uzaq jumys jasadyq. Kóp qarsylastar qashýmen boldy, sondyqtan kishkene qatelesýdiń ózi bárin joıýy múmkin», - dedi Leffler.
Onyń aıtýynsha, basketbolda birneshe oıyn jeńilse de, chempıon bolyp qala alady. «Al boksta olaı emes, bir jeńilisten Golovkın barlyq tıtýlynan aıyrylady. Djeıkobs orta salmaqtyń shyńyna jetedi. Budan buryn aıtylǵandaı, bul aıqasta qarymta kezdesý kózdelmegen. Osy jaǵdaı qyzyǵýshylyq pen shıelenisti arttyra túsýde», dep jaýap berdi Leffler HBO Boxing Podcast efırinde.
