Golovkınniń promoýteri Alvares ókilderiniń talaptaryna kónýge daıyn
ASTANA. QazAqparat - K2 Promotions atqarýshy dırektory Tom Leffler GGG men «Kanelo» jekpe-jegin ótkizý úshin Saýl Alvares ókilderiniń keıbir sharttaryn qabyldaýǵa daıyn ekendigin aıtty, dep habarlaıdy Sports.kz.
«Gennadıı qazir 18 naýryzda ótetin aıqasqa daıyndalýda. Men úshin boksshylardy Golovkınmen aıqasýǵa qyzyqtyrý qıyn, sondyqtan 2-3 qadam buryn boljap otyramyn. Erık Gomespen kelisimderdi qarashadan beri júrgizip kelemin, barlyǵy oń sheshimin tapqan sııaqty. Aıqas qyrkúıek aıynda ótedi dep oılaımyn. Biraq qazir Golovkın Djeıkobsty, al Alvares - kishi Chavesti jeńýi tıis. Aldyn ala boljaý qıyn, olardyń ekeýin de qaýipti aıqas kútip tur. Alaıda, ekeýi de jeńiske qol jetkizse, boks álemindegi iri jekpe-jek bolaıyn dep tur», - dedi Leffler.
Onyń aıtýynsha, Gennadıı jylyna tórt ret aıqasqa túskisi keledi, osylaı ol rıngke jıi shyǵatyn bolady.
«Naýryzdaǵy jaǵdaıǵa baılanysty kóremiz. Kanelomen aıqas ótpeı qalsa, biz bul aralyqta basqa jekpe-jek uıymdastyramyz. Biraq, alda ne kútip turǵanyn eshqashan bilmeımin. Golovkın barlyq ynta-jigerimen Djeıkobspen ótetin aıqasqa daıyndyq ústinde, ondaı myqty qarsylasty baǵalamaýǵa bolmaıdy. Alvarespen ótetin kezdesýde eshqandaı kedergi kórip turǵanym joq. Salmaq eshqashan kedergi keltirmegen. Biraq biz kóptegen iri aıqastardyń josparlanyp, oryn almaı qalǵandyǵyn bilemiz. Eger 18 naýryzdan keıin kelisim jasaýǵa múmkindik týsa, qolymnan kelgenniń bárin jasaımyn. Gennadıı rıngke shyqqysy keledi, ol úshin bul úlken aıqas. Dennıdi jeńse, kóptegen múmkindikter týar edi. Biz ol úshin eń jaqsy kelisimderdi jasaǵymyz keledi, ózimizdi joǵary baǵalamaımyz. Biz aıqastardy ótkizý úshin kóptegen talaptarǵa kónip kelemiz. Eger Golden Boy «A tarapynda» jáne basty promoýshen bolǵysy kelse, biz úshin bul problema emes», - dedi Leffler SecondsOut-qa bergen suhbatynda.
