Golovkınniń mindetti qarsylasy chempıondyq tıtýlyn qorǵady

ASTANA. QazAqparat - Amerıkalyq boksshy Djermall Charlo (27-0, 21 KO) Nıý-Iorkte reseılik Matveı Korobovqa  (28-1, 14 KO) qarsy aıqas ótkizdi, dep xabarlaıdy QazAqparat Sports.kz saıtyna silteme jasap.

Osy aıqasta Charlo tóreshilerdiń biraýyzdy sheshimimen jeńimpaz atandy. Biraq M.Korobov oǵan birneshe ret qatty soqqy jasap, amerıkalyqty biraz kúsh jumsaýǵa májbúrledi.

Osylaısha, Djermall mansabyndaǵy 28-shi jeńisine qol jetkizip, óz rekordyn saqtap qaldy jáne WBC tujyrymy boıynsha orta salmaqtaǵy álem chempıony «ýaqytsha» belbeýin sátti qorǵap shyqty. Korobov kásibı mansabynda ekinshi ret jeńilis tapty.

Eske salaıyq, Djermall Charlo qazaqstandyq Gennadıı Golovkınniń (38-1-1, 34 KO) áleýetti qarsylasy sanalady. Budan buryn Dúnıejúzilik boks keńesi (WBC) olardy meksıkalyq Saýl Alvarespen (51-1-2, 34 KO) aıqasý quqyǵy úshin jekpe-jek ótkizýge mindettegen edi. Degenmen, bul ıdeıany eki boksshynyń komandalary asa qoldap otyrǵan joq.