Golovkınniń kezekti jekpe-jegi qashan bolatyndyǵy talqylanyp jatyr

NUR-SULTAN. QazAqparat – Orta salmaqtaǵy IBF/IBO álem chempıony qazaqstandyq Gennadıı Golovkın (41-1-1, 36 KO) men birinshi orta dıvızıondaǵy WBO tıtýlynyń burynǵy ıegeri Haıme Mýngııa (36-0, 29 KO) arasyndaǵy jekpe-jek ótkizý máselesi talqylanyp jatyr, dep habarlaıdy QazAqparat Sports.kz-ke silteme jasap.

Taraptar jekpe-jekti 2021 jyldyń mamyr aıynda – Meksıkada 5 mamyrda toılanatyn Sınko de Maıo merekesine oraı demalys kúnderi ótkizýdi qarastyrýda. Buǵan deıin Golden Boy kompanııasynan Mýngııanyń birlesken promoýteri Erık Gomes mundaı jekpe-jekke ashyq qyzyǵýshylyq bildirgen bolatyn.

Eske sala ketsek, GGG sońǵy jekpe-jegin 19 jeltoqsanda Gollıvýdta, Florıdada ótkizgen edi. Golovkın qarsylasy Sheremetany merziminen buryn jeńip, óziniń salmaq dárejesinde rekordtyq 21-shi ret álem chempıony tıtýlyn qorǵap shyqty.

Búginde qazaqstandyq boksshynyń IBF jáne IBO tıtýldary boıynsha beldikteri bar.