Golovkınniń kelesi jekpe-jeginiń boljamdy ýaqyty ataldy

NUR-SULTAN. QazAqparat - IBF jáne IBO tıtýldary boıynsha orta salmaqtaǵy Álem chempıony Gennadıı Golovkınniń promoýteri Tom Leffler (40-1-1, 35 KO) onyń bolashaq josparlarymen bólisti, dep habarlaıdy QazAqparat Sports.kz-ke silteme jasap.

Keshe GGG tóreshilerdiń sheshimimen ýkraınalyq boksshy Sergeı Derevıanchenkony (13-2, 10 KO) jeńip, álemniń eki márte chempıony atanǵan edi.

«Biz DAZN-men kezdesip, odan arǵy jospardy talqylaýymyz qajet. Endi, Gennadıı chempıon atanyp otyrǵanda, tıtýldardy saqtap qalýy úshin aldyna mindetter qoıylady. IBF, IBO jáne DAZN neni qalaıtynyn bilip alyp, soǵan qaraı áreket jasaımyz. Degenmen, Gennadıı kelesi jyldyń basynda rıngke qaıtqysy keletinin bilemin.

«Kanelo» Sergeı Kovalevke qarsy aıqaspaq. Bul keremet jekpe-jek bolady. Biz Alvarespen judyryqtasamyz dep oılaǵanbyz. Bul jaıynda áńgimeniń barlyǵy mezgilsiz aıtylyp jatyr. Sebebi DAZN-ǵa ne keregin bilip alýymyz kerek. Sodan keıin Gennadıımen otyryp, onyń ne qalaıtynyn talqylaýymyz qajet», - dedi Seconds Out-qa bergen suhbatynda Tom Leffler.