Golovkınniń kelesi qarsylasy kim bolady
ASTANA. QazAqparat - Osy aptada Gennadıı Golovkın men Saýl Alvarestiń promoýterleri revansh boıynsha kelissózderdi bastaýdy josparlap otyr.
"Kanelonyń" ózi kelesi jekpe-jegin aldaǵy jyly ótkizýdi kózdeıdi. GGG-diń promoýteri Leffler bolsa, qarymta aıqasqa deıin taǵy bir jekpe-jekti uıymdastyrýdy qalaıdy. Golovkınniń ózi de qarsy emes, dep xabarlaıdy QazAqparat tilshisi.
Búginde tanymal boksshylar men sarapshylardyń kóbisi Golovkınge brıtandyq Bıllı Djo Sonderspen kezdesýge keńes berip jatyr. Sebebi ol boksshyda GGG-ge qajetti sońǵy belbeý - WBO tıtýly bar. Ony jeńip alsa, orta salmaqtaǵy absolıýtti chempıon atanady. Jaqynda Sonderstiń promoýteri Frenk Ýorren de jeltoqsanda Golovkınge qarsy jekpe-jek ótkizýge nıetti ekenin jetkizdi. Bir qyzyǵy, Bıllıdiń ózi GGG-men judyryqtasýǵa áli daıyn emespin dep otyr. Degenmen, brıtandyq boksshynyń kópirme sózge beıim ekenin eskersek, onyń bul oıy áli de myń qubylyp, júz ózgerýi ábden múmkin.
Golovkınde brıtandyq boksshyǵa qatysty áli jospar joq sııaqty. Onyń promoýteri Tom Leffler peýrto-rıkandyq Mıgel Kottoǵa qarsy jekpe-jekti uıymdastyrýǵa bolatynyn aıtyp qaldy. "Mıgel Kotto da Golden Boy-men jumys isteıdi. Birde ol Golovkın - Alvares jekpe-jeginiń jeńimpazymen kezdesýge ázir ekenin málimdegen. Gennadıı áli de chempıon, barlyq tıtýldaryn qorǵap shyqty. Sondyqtan naqty bir usynystar bolsa, qarastyrýǵa bolady", - deıdi Leffler. Degenmen, ol Mıgel Kottonyń komandasymen áli baılanysqa shyqqan joq. Budan bólek, qazirgi kezde ýkraınalyq Sergeı Derevıanchenko (11-0, 9 KO) IBF tıtýlynyń mindetti úmitkeri bolyp sanalady. Sondyqtan ol da Gennadıı Golovkınniń kelesi qarsylastarynyń qatarynan kórinýi ábden múmkin.
Saýl Alvarestiń komandasy bolsa, Golovkınnniń revanshqa deıin taǵy bir jekpe-jek ótkizýine qarsy. "Golden Boy Promotions" kompanııasynyń prezıdenti Erık Gomestiń aıtýynsha, Golovkın men Alvares arasyndaǵy qazirgi kelisimshart boıynsha GGG revanshqa deıin bir jekpe-jek ótkize alady. "Degenmen, birden revansh ótkizgenimiz durys bolatyn edi. Óıtkeni Golovkın jaraqat alyp qalý múmkin. Sol jekpe-jekte utylýy da yqtımal. Men ózim qarsymyn", - deıdi Gomes.
Promoýter Tom Leffler de basqa jekpe-jekterge qaraǵanda Alvarespen revansh ótkizý mańyzdy ekenin aıtyp otyr. Sebebi Gennadıı sońǵy jekpe-jektiń sheshimimen kelispeıdi. "Eger revansh kelesi jyly mamyr aıynda uıymdastyrylsa, Gena oǵan deıin rıngke shyqpaı, kúte alady. "Kanelo" mamyrda revansh ótkizýge kelispese, biz oǵan deıin taǵy bir jekpe-jekti uıymdastyratyn bolamyz", - dep atap kórsetti Leffler.
