Golovkınniń burynǵy armany ózgergen joq - promoýter Leffler
ASTANA. QazAqparat - WBA Super, WBC, IBF jáne IBO nusqasy boıynsha álem chempıony Gennadıı Golovkınge aldymen nokaýtqa túsip kórmegen meksıkalyq Saýl "Kanelo" Alvaresti jeńý kerek, dep habarlaıdy QazAqparat tilshisi.
"Gennadıı ylǵı barlyq belbeýlerdi biriktirýdi armandaıtyn. Eger ol "Kanelony" jeńse, onda sporttyq mansabynyń kelesi kezeńine shyǵa alady. Iá, onyń Alvarespen judyryqtasatyny týraly xabar lezde tarap ketti. Sebebi bul jekpe-jektiń jóni bólek. Buǵan deıingi aıqastar sonyń kóleńkesinde qalyp qoıýy ábden múmkin. Degenmen, ol áli de sońǵy tıtýl (WBO ataǵy - avt.) úshin talasqandy qalaıdy", - deıdi GGG-diń promoýteri Tom Leffler.
Aıta keteıik , Golovkın - Alvares jekpe-jegi 16 qyrkúıekte ótedi. Oǵan jankúıerlerdiń rekordtyq sany jınalady degen boljam bar. Osy jekpe-jektiń jeńimpazy WBO tujyrymy boıynsha orta salmaqtaǵy álem chempıony Bıllı Djo Sonderspen (24-0, 12 KO) kezdesýi ábden múmkin. Ol jaıynda ulybrıtanııalyq boksshynyń promoýteri Frenk Ýorren de aıtyp otyr .
Al Golovkın men Alvares arasyndaǵy kelisimshartqa keler bolsaq, onda meksıkalyq boksshyǵa qarymta kezdesýge múmkindik berilip otyr. Bul degenimiz, Alvares utylsa, Golovkın mindetti túrde buǵan kelisýi tıis. Al qazaqstandyq boksshynyń ózi jeńilip qalsa, qarymta kezdesýdi talap ete almaıdy. Boxingnews24.com saıtynyń jýrnalısi Den Embroýztyń oıynsha, Golovkınge «sarybas» meksıkalyq juldyzdy nokaýtpen jeńý kerek. Eger bul aıqas ta nokaýtpen aıaqtalsa, GGG kásibı bokstyń ǵana emes, PPV reıtıngi shyńyna da shyǵa alady.
