Golovkınniń bapkeri málimdeme jasady
ASTANA. QazAqparat - Abel Sanches meksıkalyq boksshy Saýl Alvareske qatysty jazalaý sharalary boıynsha málimdeme jasady. Nevada shtatynyń atletıkalyq komıssııasy (NSAC) ony alty aıǵa bokstan shettetti. Alaıda aıyppul salǵan joq. Alty aıda dopıng testiden ótýge de mindettemedi, dep xabarlaıdy QazAqparat tilshisi Boxingscene.com. saıtyna silteme jasap.
A.Sanches óz málimdemesinde komıssııanyń sheshimin synǵa aldy. "NSAC reglamenti boıynsha dıskvalıfıkatsııaǵa ushyraǵan bokshyny kóp teksermeıdi. Sonda ol boksshy burynǵy ómir saltyn jalǵastyryp, qazirgi júıeni óz múddesi úshin qoldana beredi. Biz taza sportty qoldaýymyz qajet qoı. Al ondaı boksshylar qalypqa kelý ýaqytyn bile tura, tártipsiz daıyndyǵyn jalǵastyra alady. NSAC dıskvalıfıkatsııa kezinde dopıng testterinen ótýge talap ete ala ma? Joq bolsa, belsendilik tanytyp, sportqa kómek kórsetýdiń qajeti qansha?", - deıdi A.Sanches.
GGG-diń bapkeri WBC-di de synǵa aldy. Sebebi Saýl Alvares ataǵan uıymnyń "Taza boks" atty dopıngke qarsy baǵdarlamasyna áli de kirgen joq. Atalǵan baǵdarlama aıasynda VADA boksshylardy eskertpeı, synama alyp, dopıngtiń bar-joǵyn tekserip otyrady. Al baǵdaralamaǵa kirmegen boksshylar WBC reıtınginen shyǵarylýy tıis. Alaıda uıym basshysy Maýrısıo Sýleıman olaı istegen joq. Alvares "Taza boksqa" kirmese de, WBC-diń reıtıngisinde tur.
"WBC qoǵamnyń ózine qatysty kózqarasyn ózgerte alady. Ol úshin "Taza boks" baǵdarlamasynyń barlyq erejelerin buljytpaı oryndap, VADA-men birge eshbir eskertýsiz tekseristerdi jasaý qajet. Odan keıin testterdiń nátıjesin ashyq jarııalaǵan jón. Ózińizdiń súıikti uldaryńyzdy (Saýl Alvares - avt.) da tys qaldyrmaı, únemi tekserip otyrsańyzdar, WBC-diń burynǵy jáne qazirgi chempıondaryna jasaǵan úlken qurmetterińiz bolar edi. Buǵan deıin WBC dopıngke qarsy baǵdarlamaǵa qatyspaǵan talaı boksshylardy reıtıngten shyǵaryp tastady. Barlyǵyna birdeı qaraý qajet", - dep atap kórsetti A.Sanches.
