Golovkınniń Astanadaǵy aıqasyn qazaqstandyq tarap áli sheshpedi - GGG komandasy

ASTANA. QazAqparat - Qazaqstandyq boksshy Gennadıı Golovkın (37-0, 33 KO) komandasynyń ókili Janar Ótesheva brıtandyq Bıllı Djo Sonderspen (24-0, 12 KO) bolýy yqtımal jekpe-jek týraly aıtyp berdi, dep jazdy Sports.kz The Steppe saıtyna silteme jasap.

«Búginde Astana jaı ǵana kezekti boks keshiniń emes, anaǵurlym iri aýqymdaǵy jáne joǵary deńgeıdegi sharanyń ıesi bolýy múmkin. Bul tarıhı kezeń. Yqtımal kezdesýdi álemdik boks jylnamasyna qazirdiń ózinde jazyp qoıýǵa bolady, sebebi sońǵy 10 jylda alǵash ret (!) absolıýtti álem chempıony ataǵy úshin biriktirilgen jekpe-jek ótkeli otyr. Gennadıı Golovkınge armanyna qol jetkizýge bir-aq qadam qaldy jáne bul qadamdy bizdiń chempıon óz elinde, óz otandastarynyń aldynda jasaǵysy keledi.

Jańalyqtar ázirge qańqý sózderge toly. Elimizde ótetin aıqastyń taǵdyry jáne datasy áli sheshilgen joq. Jáne osyǵan qatysty úshinshi adamdardyń barlyq málimdemeleri - Golovkınniń esimi arqyly ózderin jarnamalaý ǵana.   GGG komandasy qolynan kelgenniń barlyǵyn jasady. Biraq boks keshin ótkizý máselesi áli de sheshilmedi jáne ol negizinen, qazaqstandyq taraptan uıymdastyrýshylyq jaǵdaılarǵa baılanysty bolyp otyr», - dedi Ótesheva.

Golovkın - Sonders jekpe-jegi maýsym aıynda, Astanadaǵy EXPO halyqaralyq kórmesi aıasynda ótetini kútilýde .

Aıta keteıik, atalmysh kórme aıasynda sondaı-aq qazaqstandyq ózge kásipqoı boksshylar Qanat Islam men Janqosh Turarovtyń aıqastary ótetini josparlanǵan. WBA tujyrymy boıynsha birinshi aýyr salmaqtaǵy álem chempıonyBeıbit Shúmenov te bul boks keshinde judyryqtasýǵa daıyn ekenin jetkizgen edi.