Golovkınniń 2015 jylǵy jekpe-jekteri qaı kezderi ótetini belgili boldy
ASTANA. QazAqparat - Orta salmaqta WBA jáne IBO tujyrymdary boıynsha álem chempıony, WBC atalymynyń ýaqytsha chempıony belbeýiniń ıegeri otandasymyz Gennadıı Golovkınniń 2015 jylǵy birinshi kezdesýi 21 aqpanda Monakoda ótetin boldy, dep jazady massaget.kz.
Qarsylasy - Martın Mıýrreı. Bokssúıer qaýym brıtandyq boksshyny Gena úshin asa myqty qarsylas sanamaıdy. Onyń meksıkalyq Mark Antonıo Rýbıonyń kúıin keship jatsa tańdanbaıtyny anyq. Al otandasymyzdyń promoýteri Tom Leffler bolsa, brıtandyq boksshyny orta salmaqtaǵy álemniń myqtylarynyń qataryna qosyp otyr.
Sondaı-aq, sol jyly ótetin ekinshi jekpe-jeginiń de ýaqyty anyqtaldy. Bul týraly boksshynyń menedjeri Oleg German habarlady.
- Biz 2015 jyly múmkin bolsa Mıgel Kotto, Saýl Alvares jáne Hýlıo Sesar Chavestiń (kishisi) birimen kezdesý ótkizýdi uıymdastyrýdy josparlap otyrmyz. Eger mamyr aıynda Kotto men Kanelo arasynda jekpe-jek óter bolsa, kúzde osy juptyń jeńimpazymen Genanyń shyǵýyna múmkindik bar. Al 2015 jylǵy ekinshi jekpe-jek «NVO» kestesine sáıkes 16 mamyr kúni ótedi. GGG qarsylasy retinde Matveı Korobov pen Endı Lı arasyndaǵy WBO chempıondyq ataǵy úshin ótetin kezdesýdiń jeńimpazyn tańdap otyrmyz, - dedi.
Oleg German sózine súıener bolsaq, Gennadıı Golovkınniń 2015 jylǵy ekinshi jekpe-jeginiń ýaqyty belgilengenmen, naqty qarsylasy anyq emes. Kelisimge kelmeı jatsa, Matveı Korobov pen Endı Lı kezdesýiniń jeńimpazy qarsylas atanbaı qalýy da múmkin.
