Golovkınnen jeńilgen boksshy onymen taǵy aıqasqysy keledi

ASTANA. QazAqparat - Rıngke oralǵany týraly kópshilikke jarııalaǵan amerıkandyq boksshy Domınık Ýeıd (18-1, 12 KO) orta salmaqta úlken jekpe-jek ótkizýge ruqsat suramaq. Sonyń ishinde ol qazaqstandyq boksshy Gennadıı Golovkınmen (38-1-1, 34 KO) qaıta aıqasýǵa nıetti, dep habarlaıdy Sports.kz.

«Men reıtıngterdiń shyńyna jetemin, osy joly burynǵydan da myqty bolamyn. Úlken jekpe-jekterge ruqsat alǵansha aıqasam. «Kanelo», Golovkın, Djeıkobs, Charlo, Andrade jáne orta salmaqtaǵy basqa da myqty boksshylarmen judyryqtasatyn oıym bar. Birneshe aıqastan soń dıvızıondaǵy úzdik «úshtikte» bolatynymdy sezip otyrmyn. Bári alda ekenine senimdimin», - dep málimdedi Ýeıd.

2016 jyldyń sáýir aıynda Domınık Ýeıd Golovkınnen jeńilip qalǵan bolatyn. Bul amerıkandyq boksshynyń rıngtegi alǵashqy jeńilisi boldy. Odan keıin Ýeıd eki jyl boıy rıngke shyqpady. Domınık kelesi jekpe-jegin 17 qarasha kúni ótkizetinin málimdedi, alaıda onyń qarsylasy kim bolatyny ázirge belgisiz.