Golovkınge jyldamdyq jetispedi - Artaev
ASTANA. QazAqparat - Olımpıada chempıony Baqtııar Artaevtyń oıynsha, Gennadıı Golovkın búgingi jekpe-jegin 12-raýndqa deıin ádeıi sozǵan joq, dep xabarlaıdy QazAqparat tilshisi.
"Bul jerde ádeıi jasalǵan eshteńe joq. Óıtkeni bul bárin aldyn ala oılastyryp qoıatyn kontsert emes qoı, bul - naǵyz shynaıy bolǵan jekpe-jek. Osy jekpe-jekte Djeıkobstyń myqtylyǵy emes, onyń Genamen bolatyn aıqasqa jaqsy daıyndalǵany baıqalyp-aq tur. Al Gena óz qarsylasynyń kiltin taba almady. Oǵan jyldamdyq jetispedi. Djeıkobstyń jaqsy daıyndalǵany kórinip tur. Degenmen, óz basym Golovkınniń jeńetinine sendim, esh qobaljý bolǵan joq", - dedi Artaev QazAqparat tilshisine bergen suxbatynda.
Onyń aıtýynsha, Djeıkobspen qaıta aıqas ótkizý máselesi bolashaqtyń enshisinde. Ázirshe ony ótkizbeıdi.
Aıta keteıik, búgingi jekpe-jekte orta salmaqta WBA (Super), IBO, WBC jáne IBF nusqalary boıynsha álem chempıony Gennadıı Golovkın (36-0, 33 KO) kezekti jeńisine qol jetkizip, barlyq belbeýlerin qorǵap qaldy. Alaıda úzdiksiz nokaýttar serııasy osymen aıaqtaldy. Al Denıel Djeıkobs (32-1, 29 KO) óziniń sporttyq mansabynda ekinshi ret jeńilis tapty. Jekpe-jekten keıin Gennadıı Golovkın osy jolǵy aıqasty 12-shi raýndqa deıin jetkizýdi kózdemegenin aıtty .
Olımpıada chempıony Baqtııar Artaev osy jekpe-jekke tikeleı efırde sholý jasady.
