Golovkınge maýsym aıynda jekpe-jek ótkizýdi usyndyq - Frenk Ýorren
ASTANA. QazAqparat - Brıtandyq boksshy Bıllı Djo Sonderstiń (26-0, 12 KO) promoýteri Frenk Ýorren GGG-ge qarsy jekpe-jektiń kelissózderi týraly aıtyp berdi, dep habarlaıdy QazAqparat tilshisi.
«Biz Golovkınniń komandasymen sóılestik. Aldaǵy ýaqytta taǵy da sóılesemiz. Odan bir nátıje shyqsa, mindetti túrde aıtamyz. Eger Golovkın maýsym aıynda bokstasýdy qalasa, onda Bıll daıyn bolady. Olar kelesi jekpe-jekti 5 mamyrda Las-Vegasta ótkizýdi qalaıdy. Alaıda oǵan deıin laıyqty qarsylas taba almaıtyn tárizdi. Bul shoýdan qysqa ýaqyttyń ishinde tabys tabý da qıyndaý bolady», - dedi F.Ýorren VVS arnasyna bergen suhbatynda.
F.Ýorren Golovkın-Sonders jekpe-jegin maýsym aıynda Anglııada, ıa bolmasa AQSh-ta uıymdastyrýǵa bolady dep sanaıdy.
«Anglııada bolsa, sóz joq, stadıonda ótkizý kerek. Biz onyń bárin osy aptanyń ishinde pysyqtap alýǵa tyrysamyz. Biraq bizge tezdetip bir kelisimge kelý kerek. Sebebi maýsymǵa deıin ýaqyt az. Biz Mıýrreıge qarsy jekpe-jekti keıinge qaldyryp otyrǵan joqpyz. Degenmen, Bıll Golovkınge qarsy shyǵýdy qalaıdy. Golovkın de atalǵan jekpe-jekti qalaıtynyn talaı ret aıtqan», - dep atap kórsetti Bıllı Djo Sonderstiń promoýteri.
Aıta keteıik, Golden Boy Promotions promoýterlik kompanııasy qazaqstandyq Gennadıı Golovkınmen (37-0-1, 33 KO) ekinshi aıqastyń ótpeıtindigin resmı túrde jarııalady. Sonders bolsa, sáýirdiń sońynda Martın Mıýrreıge qarsy shyǵatynyn málimdegen. Alaıda qolynan jaraqat alyp qalýyna baılanysty ol jekpe-jekti maýsymnyń aıaǵyna aýystyrdy.
Foto: thesun.co.uk
