Golovkınge kelesi kezdesýde qarsylas bolýy múmkin boksshy ataldy

ASTANA. QazAqparat - BoxingInsider.com saıty qazaqstandyq boksshy Gennadıı Golovkınniń meksıkalyq Saýl Alvarespen ótken rematchynan keıin kimmen kezdesýi múmkin ekeni týraly boljam jasady, dep habarlaıdy Sports.kz.

«Golovkın - Sonders arasyndaǵy jekpe-jek kópten beri talqylandy, dál qazir  ony ótkizýdiń eń qolaıly sáti týyp tur. Bul kezdesý Golovkınge álem chempıony tıtýlyn qaıtarýǵa múmkindik berer edi. Al Sonders úshin Lemeni jeńgennen keıin ary qaraı sátti oıyn kórsetýge jaǵdaı jasaıdy. Golovkındi jeńse, bedeli artary sózsiz.

Golovkın úshin boksta ne qaldy? Orta salmaqta oıyn kórsetip, barlyǵyna óz kúshin dáleldep berdi. Salmaq dárejesin ózgertýi ekitalaı. Jıyrma ret tıtýlyn saqtap qaldy, endi qolǵabyn ilip qoıyp, demalýyna bolady. Degenmen, Kanelomen taǵy bir bokstasqanyn tamashalaǵymyz keledi. Al Golovkın jeńetin bolsa, olar tórtinshi ret kezdesýi múmkin be?», - dep jazylǵan basylymda.