Golovkınge Alvaresti nokaýtpen jeńgen tıimdi me
ASTANA. QazAqparat - Gennadıı Golovkın men Saýl Alvarestiń jekpe-jegi 5 mamyrda ótedi. Búginde ekinshi aıqastyń nátıjesine qatysty san alýan boljamdar aıtylýda, dep habarlaıdy QazAqparat tilshisi.
Boxingnews24.com saıtynyń sarapshysy Tım Roınerdiń oıynsha, osy jekpe-jekten keıin taǵy bir aıqasty uıymdastyrýǵa ábden bolady. Eki boksshy qaıtadan qyrýar paıda taba alady. «Alaıda osy joly Golovkın «Kanelony» aýyr nokaýtqa túsirse, úshinshi jekpe-jek ótpeýi de múmkin. Golden Boy Promotions táýekelge barmaı, óz boksshysyn saqtap qalýǵa tyrysady. Sol sebepti basqa qarsylastardy izdeıdi. Al GGG nokaýtqa túsip qalsa, onda ol «Kaneloǵa» qarsy taǵy bir jekpe-jek - úshinshi aıqasty ótkizýge tyrysady», - dep jazdy T.Roıner.
Onyń sózine qaraǵanda, Golovkın men Alvarestiń jekpe-jegi trılogııaǵa ulassa, orta salmaqtaǵy WBO chempıony Bıllı Djo Sonderstiń kútýden basqa amaly qalmaıdy. «Eger Alvares Golovkındi jeńse, qyrkúıekte úshinshi kezdesýdiń ótýi ábden múmkin. Al Golovkın utsa, Alvarestiń bedeli túspeıdi. Sebebi GGG - orta salmaq dárejesindegi eń myqty boksshy. Bul Denıel Djeıkobs, Djermall Charlo, Demetrıýs Andrade nemese Sergeı Derevıanchenkodan utylǵannan áldeqaıda jaqsy», - dep atap kórsetti T.Roıner.
