Golovkındi «jyǵyp bergen» tóreshi mańyzdy jekpe-jekterden shettetildi
ASTANA. QazAqparat - Qazaqstandyq boksshy Gennadıı Golovkın men meksıkalyq Saýl Alvarestiń aıqasyndaǵy tóreshilerdiń biri Adelaıda Berd ýaqytsha iri jáne mańyzdy aıqastardan shettetildi. Bul týraly Nevada shtaty Atletıkalyq komıssııa basshysy Bob Bennet málimdedi.
«Men ony ázirge mańyzdy aıqastarǵa jibere almaımyn. Ol burynǵysha óz isimen aınalysatyn bolady, alaıda ol biraz qol úze turýy kerek. Oǵan bul kesh óte aýyr boldy. Ókinishke oraı, ol óz mindetin oıdaǵydaı atqara almady. Onyń qoıǵan baǵasy aıqasqa sáıkes kelmedi», - dep keltiredi Bennettiń sózin Los Angeles Times.
Eske salaıyq, meksıkalyq boksshynyń paıdasyna 118:110 degen upaı qoıǵan Berd boks qoǵamdastyǵynyń narazalyǵyn týdyrdy. Basqa tóreshi Deıv Morettı (115-113) Golovkındi jeńdi dep eseptese, úshinshi tóreshi Don Trella (114-114) ekeýin teń tústi dep sanaǵan. Gennadıı Golovkın men Saýl Alvarestiń jekpe-jegi teń oıynmen aıaqtaldy.
Aıta keteıik, buǵan deıin birqatar BAQ-tar Mennı Pakıao, Sergeı Kovalev jáne Terens Kroýford syndy áıgili boksshylar tóreshilerdiń bura tartqandyǵyn, bul kezdesýde Golovkın jeńdi dep sanaıtyndyqtaryn jarııalaǵan.
