Golovkındi nokaýtpen jeńgim keledi - «Kanelo»
ASTANA. QazAqparat - Eki salmaq dárejesi boıynsha burynǵy álem chempıony meksıkalyq Saýl «Kanelo» Alvares orta salmaqtaǵy WBA (Super), IBO, WBC jáne IBF nusqalary boıynsha álem chempıony Gennadıı Golovkındi nokaýtpen jeńgisi keletindigin málim etti.
«Aıqastyń Las-Vegasta ótetindigi men úshin artyqshylyq bola ala ma? Olaı dep oılamaımyn. Óıtkeni, Golovkın tájirıbeli boksshy. Golovkınniń komandasy meniń soqqylarymnyń kúshin baǵalamaıdy dep oılamaımyn. Boksta bári de bolady. Ásirese qarsylastarynyń bárin de nokaýtqa túsirip júrgen eki jigit týraly áńgime qozǵalyp otyrǵanda. Árıne, men Golovkındi nokaýtpen jeńgim keledi», - dedi Saýl Alvares Fansided.com-ge bergen suhbatynda.
«Golovkınniń álsiz tustary bar, biz soǵan baǵyttap jumys jasap jatyrmyz. 16 qyrkúıek kúni bul qupııany ashatyn bolamyz», - dedi «Kanelo».
Aıta keteıik, Golovkın-Alvares jekpe-jegi 16 qyrkúıek kúni Las-Vegastaǵy 20 myń adamdyq T-Mobile arenasynda ótedi.
