Golovkındi nokaýtqa jibere alamyn - Marko Antonıo Rýbıo
ASTANA. QazAqparat - Gennadıı Golovkınmen aradaǵy kelesi jekpe-jekke negizgi úmitker meksıkalyq boksshy Marko Antonıo Rýbıo qazaqstandyq bylǵary qolǵap sheberin nokaýtqa jibere alatyndyǵyn málimdedi, dep habarlady vesti.kz Boxingscene.com portalyna silteme jasap.
Rýbıo áli kúnge sharshy alańda jeńilistiń aşy dámin tatpaǵan qazaqstandyq boksshynyń jolyna tosqaýyl qoıa alatyndyǵyna senimdi. 18 qazanda Golovkınmen ótetin jekpe-jek - meksıkalyq boksshynyń basty maqsaty. Aıta keterligi, Rýbıo WBC nusqasy boıynsha ýaqytsha álem chempıony jáne qazirgi chempıonmen Mıgel Kottomen judyryqtasýǵa mindetti. Laıda Rýbıo komandasy Kottomen taıaý aralyqta sharshy alańdaǵy kezdesýdiń óte qoıatyndyǵyna senimsiz.
Rýbıonyń atap ótýinshe, Golovkın - jaqsy boksshy. Biraq, meksıkalyqtyń Gennadııdi jeńýge shamasy jetetin kórinedi. «Menińshe, Golovkın óte myqty. Biraq, meniń oǵan laıyqty qarsylas bolýǵa, tipti nokaýtqa jiberýge de kúshim jetedi. Men bul jekpe-jekpe daıyndalmaqpyn, kezdesý óte qıynǵa túsedi», - dedi ol.
Esterińizge sala keteıik, taıaýda batystyq basylymdar kásipqoı boks arenasynda el namysyn qorǵap júrgen jerlesimiz Gennadıı Golovkın kelesi kezdesýin 18 qazan kúni meksıkalyq Mark Antonıo Rýbıoǵa qarsy ótkizýi múmkin ekendigin jarııalaǵan bolatyn. Meksıkalyq boksshy qazirgi tańda orta salmaqtaǵy WBC tujyrymy boıynsha chempıondyq belbeýdiń ýaqytsha ıegeri sanalady. Sońǵy kezdesýin sáýir aıynda ıtalıan Domenıko Spadaǵa qarsy ótkizip, mezgilinen buryn jeńiske jetken. 34 jastaǵy boksshy 2000 jyldan beri kásipqoı boksta baq synap keledi. Osy aralyqta 62 jekpe-jek ótkizip, 55-inde jeńiske jetken. 6 kezdesýinde jeńilis tapsa, 1 judyryqtasýyn teń aıaqtaǵan. Al 55 jeńisiniń 48-inde qarsylasyn nokaýtqa jibergen.
