Golovkın World Boxing uıymynyń prezıdenti laýazymyna resmı túrde úmitker atandy
Olımpıada oıyndarynyń kúmis júldegeri, World Boxing uıymy Olımpıadalyq komıssııasynyń tóraǵasy jáne Qazaqstan Ulttyq Olımpıadalyq komıtetiniń prezıdenti Gennadıı Golovkın Halyqaralyq boks federatsııasy - World Boxing uıymynyń prezıdenti qyzmetine resmı úmitkerler tizimine engizildi.
Ulttyq olımpıadalyq komıtettiń málimetinshe, atalǵan uıymnyń jańa prezıdentin saılaý 23 qarasha kúni Rım qalasynda World Boxing kongresi aıasynda ótedi. Sondaı-aq kongress barysynda federatsııa Atqarýshy komıtetiniń músheleri de tańdalady. Qazirgi tańda WB quramyna kiretin 125 eldiń ókilderi daýys berýge qatysady.
World Boxing - 2023 jyldyń sáýir aıynda qurylǵan halyqaralyq boks federatsııasy. 2024 jyldyń qyrkúıeginde Gennadıı Golovkın WB uıymynyń jańa Olımpıadalyq komıssııasynyń tóraǵasy bolyp taǵaıyndalǵan edi. Onyń negizgi mindeti - boksty Olımpıada baǵdarlamasynda saqtaý jáne World Boxing uıymynyń Halyqaralyq Olımpıadalyq komıtet tarapynan resmı moıyndalýyna yqpal etý.
2025 jyldyń aqpan aıynda Halyqaralyq Olımpıadalyq komıtet World Boxing uıymyn ýaqytsha moıyndady. Bul sheshim uıymǵa álemdik deńgeıde boksty basqarý quqyǵyn berdi. Al naýryz aıynda HOK boksty 2028 jyly Los-Andjeleste ótetin Olımpıada oıyndarynyń baǵdarlamasyna resmı túrde engizý týraly sheshim qabyldady.
Gennadıı Golovkın - Qazaqstan Respýblıkasynyń eńbek sińirgen sport sheberi, 2004 jylǵy Olımpıada oıyndarynyń kúmis júldegeri, 2003 jylǵy álem chempıony. Kásibı rıngte IBF (2015-2018, 2019-2023), IBO (2011-2018, 2019-2023) jáne WBA (2010-2018, 2022-2023) tujyrymdary boıynsha álem chempıony atanǵan. Ol qatarynan 23 jekpe-jekte qarsylasyn nokaýtpen jeńip, orta salmaq tarıhynda eń joǵary nokaýt kórsetkishi úshin Gınnestiń rekordtar kitabyna engen.
Eske salsaq, buǵan deıin Golovkınniń Halyqaralyq boks Dańq zaly múshesine úmitkerler qataryna engenin jazǵan edik.